Ноябрьның 6-да, Тывада капитал септелге соонда эде чаартылгалыг ийи өөредилге чери: Барун-Хемчик кожууннуң Кызыл-Мажалык суурда «Чечек» уруглар сады база Ак-Довурак хоорайда даг техникумунуң өөредилге корпузу байырлыы-биле ажыткан. Тываның Баштыңы Владислав Ховалыг ооң дугайында МАХ-та албан езузунуң каналынга дыңнаткан.
«Өг-бүле» национал төлевилелдиң «Өг-бүлеге деткимче» федералдыг төлевилели-биле 140 олутка көрдүнген «Чечек» холушкак хевирниң уруглар садының капиталдыг септелгезиг кылган. Ажыл үезинде айыыл чок болгаш таарымчалыг оран-саваны тургузарынга материалдарның шынарынче болгаш технологияларны сагыырынче онза кичээнгейни угландырган. Өскерлиишкин чүгле тудуг ажылдары-биле кызыгаарлаттынмаан.
Албан чериниң материал-техниктиг баазазын база чаарткан: уруглар сады амгы үениң дериг-херекселдери-биле, ооң иштинде ойнаар комплекстер-биле дериттинген. Школа назыны четпээн уругларның бүгү талалыг сайзыралынга байдалдарны тургускан.
Кызыл-Мажалыктың социал инфраструктуразының хөгжүлдезинге чугула үлүг-хуузун кииргенин «Чечек» уруглар садының чаа хевиринден көрүп болур. «Чаа эт-септиг болгаш ойнаар шөлдерлиг амгы үениң оран-савазынга уругларның өзүп, ойнап, бүгү талалыг сайзыраарынга бүгү байдалдар бар» - деп, Владислав Ховалыг демдеглээн.
Ак-Довурактың даг техникумунуң инфраструктура чаартылгазын «Аныяктар болгаш уруглар» национал төлевилелдиң «Профессионалитет» федералдыг төлевилелинге киришкеш, чедип алган. Өөредилге корпузунда беш чаа тускайлаттынган лабораторияларны дерээн, мастерскаялар болгаш өөредилге кабинеттери бүрүнү-биле чаарттынган. «Бо чүүл студентилерниң практиктиг белеткелинге аргаларны калбартып, херек мергежилдерни шиңгээдип алырынга дузалаар» - деп, республика Баштыңы чугаалаан.
1966 чылда үндезилеттинген Ак-Довурактың даг техникуму алдан чылдарның дургузунда даг-тывыш үлетпүрүнге болгаш регионнуң экономиказынга кадрларны белеткээринге улуг рольду ойнаан. Бөгүн албан чери үлетпүр бүдүрүлгелери-биле кады ажылдажылганы быжыглап, шынарлыг профессионал өөредилгеге байдалдарны тургузуп, хөгжүп сайзыраан. Тыва Республиканың Өөредилге яамызы албан чериниң эде чаартылгазы ам-даа уламчылаарын дыңнаткан. 2027 чылда планнаттынган дараазында чадада – ниити чуртталга бажыңынга капитал септелгези кылыптарга, ол студентилерниң чүгле өөрениринге эвес, а чурттаар байдалын база экижидиптер.
Регион Чазааның мурнады боттандырар ажыл угланыышкыннарының бирээзи – өөредилге инфраструктуразын хөгжүдеринде. «Өзүп орар салгалдарывыс төрээн черинге боттарының куурлавырларын боттандырзын дээш, шынарлыг өөредилгени бээринге бүгү-ле байдалдарны ам-даа тургузар бис» – деп, Владислав Ховалыг демдеглээн.