.webp)
Тывада тускай шериг операцияларының киржикчилеринге болгаш оларның өг-бүлелеринге социал төлевирлер, чиигелделер болгаш өске-даа деткимче хемчеглериниң талазы-биле дарый консультация бээр социал онлайн хүлээп алыышкын төвү ажылдып турар.
Тываның Күш-ажыл болгаш социал политика яамызының мониторинг, анализ, курлавыр хандырылгазының республика төвү Амыдыралдың берге байдалдарында уругларны деткиир фондунуң деткимчези-биле төлевилелди боттандырып турар. Республиканың шупту 19 муниципалдыг тургузугларын онлайн-хүлээп алыышкын төвүнде кошкан.
Бөгүнге чедир онлайн хүлээп алыышкын 600 ажыг долгаашкыннарны хүлээп алган. Специалистер дилег бүрүзүнге чогуур тайылбырларны берген. Регионнуң Күш-ажыл яамызының дыңнатканы болза, чурттакчылар регионалдыг төлевирлер дугайында тайылбырлап бээрин хөйү-биле дилээн.
Оон аңгыда социал хөмүр болгаш одаар ыяш-биле хандырылга, 5-11 класстарның школачыларынга чемненир база 1-11 класстарның өөреникчилеринге орук чарыгдалдарынга компенсацияны эгидери, читкен ТШО киржикчилерин дилеп-тывары, психологтуг дузаны алыры, гуманитарлыг ачы-дуза чедирилгези дээш, оон-даа өске айтырыглар кирген.
«Социал онлайн хүлээп алыышкын» хүннүң-не ажылдап турар. Специалистер дилеглерни хүлээп, өг-бүлелерге амгы деткимче хемчеглерин билип алырынга, херек медээлерни алырынга дузалажып, дараазында кылыр базымнарны айтып бээр.
8-394-22-2-17-44 дугаарлыг телефонче долгааш, консультацияны ап болур.