Тожу кожууннуң Тоора-Хем суурда чаа, амгы үениң спортчу залы аалчыларга эжиктерин ажыткан. Тываның Баштыңы Владислав Ховалыг байырлыг езулалга киришкенин бодунуң Макс каналынга дыңнаткан.
Чаа спорт объектизи 850 дөрбелчин метр шөлдүг. Тоора-Хемниң чурттакчылары аңаа мини-футбол, волейбол, баскетбол, стол теннизи, шашки, шахмат, хүрештиң аңгы-аңгы хевирлерин шиңгээдир. Объектиге кожуун болгаш республика чергелиг маргылдааларны эрттирер арга бар апарган. Ында душтуг солуттунар черлер, тренерлер өрээлдери болгаш техниктиг комнаталарны аңгылаан. Комплекстиң ажылын хандырар модульдуг котельнаялыг автономнуг чылыдылга системазын туткан, аңгы кудуктуг.
Чаа спорт залы бедик тиилелгелерниң болгаш командалыг тура-соруктуң шөлү, шимченгир амыдыралдыг кижилерни хаара тудар төп апаар дээрзин Владислав Ховалыг демдеглээн. Тываның Баштыңы тудугну деткээн инвестор – «Ареал» компания бөлүүнге өөрүп четтиргенин илереткен. «Бо дээрге инвесторнуң деткимчези-биле туттунган ийи дугаар улуг объект болур, ооң бир дугаары 2025 чылда Эрзин суурга ажыттынган. Оон ыңай компания Тываның суурларында сес биче спорт залдарын тударын акшаландырган, оларның алдызы ажыглалче кирген» - деп, ол сагындырган.
Тываның Баштыңы чаа спортчу объект келир үениң чемпионнарын кижизидип өстүреринге күштүг идигни бээр дээрзинге бүзүрелин илереткен. «Республикавыстың булуң бүрүзүнге спорт чедингир болзун дээш, бүгү-ле байдалдарны тургузарын уламчылаар бис» - деп, ол аазаан.
«Ареал» компания бөлүү республикада Ак-Суг болгаш Тастыг чыдыннарын шиңгээдиринге киржип, аңаа даг-болбаазырадылга комбинаттарын тудар. Төлевилел чеди муң ажыг ажылчын олуттарны тургузуп, 2033 чылга чедир регион бюджединче 8 млрд ажыг рубль үндүрүг орулгаларын киирер ужурлуг.
Инвестор бо чылын Тожу кожуунда Хамсара хемге көвүрүгнү шалыпкын тудуп, бүдүн чылдың айыыл чок шимчээшкинин хандырган. Ооң мурнунда Хамсараны кежир транспорт шимчээшкини чылдың үезинден хамааржыр турган. Чаа тудуг дыка быжыг болгаш, 100 тонна чедир чүъктү эрттирип шыдаптар.
Оон аңгыда, компания электри шугумнарын болгаш Ий суурда 220 кВ күчүлүг «Тоора-Хем» подстанциязын тудуп турар. Ол Тоора-Хем, Адыр-Кежиг, Ий, Ырбан суурларның чурттакчыларынга бүзүрелдиг төпчүткен электри чырыын бээр.