Тываның Баштыңы Владислав Ховалыг Чоннуң чаңгыс деминиң хүнү-биле республиканың чурттакчыларынга байыр чедиргеш, Россияның кол байлаа – культуразы, езу-чаңчылдары болгаш дылдары ылгалдыг-даа болза, ооң кижилеринде, чүс-чүс чылдарда чоннарның найыралында, ниити үнелиг чүүлдеринде болгаш кады болур дээн күзелинде дээрзин демдеглээн.
«Россияның күжү быжыг демнежилгеде, чүс-чүс чоннарның амыр-тайбыңы, эп-найыралы болгаш бот-боттарынга хүндүткел болур. Берге үелерде каттыжып, бот-боттарывысты деткижип билир бис» - деп, Владислав Ховалыг чугаалаан.
Бо хүнде ол сөстер онзагай ханы уткалыг. Тываның чурттакчылары мурнуку одуругда чаңгыс чер чурттугларын сеткилинден деткип, оларның өг-бүлелеринге дузалажып, гуманитарлыг дузаны чыып, чорудуп турар. Ындыг ачы-буян бүрүзү бистиң ниити күчү-күжүвүстүң, бот-боттарывыска сагыш човаашкынывыстың болгаш харыысалгавыстың илередии болур. Чаңгыс демнежилгевис-биле бергелерни ажып эртип, төрээн черивиске амыр-тайбыңны болгаш турум чорукту камгалап кадагалаарынга дузалаар деп, регионнуң удуртукчузу демдеглээн.
Владислав Ховалыг чурттуң Президентизиниң 2026 чылда чарлаан Россияның чоннарының чаңгыс демниг чоруунуң чылының онзагай ужур-утказын база демдеглээн. Аңгы-аңгы чоннарының төлээлери тайбың болгаш эгин кожа чурттап чоруур Тывага бо чыл националдар аразында эптежилгениң, езу-чаңчылдарынга болгаш культурлуг өнчү-салгалынга камныг хамаарылганың үнезин демдеглээр база бир арга апарган.
«Силерниң бажыңыңарга кезээде амыр-тайбың, чылыг-чымчак болгаш бот-боттарыңарга билчиишкин турзун» - деп, республика Баштыңы байыр чедириишкининде айыткан.