Тываның Баштыңы Владислав Ховалыг республиканың ажыл-агыйының аңгы-аңгы адырларының төлээлеринге күрүне шаңналдарын тывыскан. В.Көк-оол аттыг Национал театрга Чоннуң чаңгыс деминиң хүнүнге тураскааткан байырлыгконцерт үезинде күш-ажылдың мурнакчыларынга Россияның болгаш республиканың шаңналдарын тывыскан.
Владислав Ховалыг Россияның чоннарының чаңгыс деминиң чылында Чоннуң чаңгыс демниг чорук хүнүнүң онзагай ужур-утказын — ол хамааты ниитилелдиң шупту институттарының, аныяктарның, волонтерларның, патриотчу организацияларның, шажын болгаш национал каттыжыышкыннарның, ол ышкаш бизнес-тургузуушкуннарның күжениишкиннерин мөөңнээри темалыг чылдың кол болуушкуну апарганын байыр чедириишкининде демдеглээн.
«Чурттуң күчү-күжү тайбың болгаш эп-найыралдыг чурттап билиринден кезээде магадылаттынар. Бөгүн, мурнуку одуругда дайынчылар болгаш тылда ишчилер ниити сорулганы чедип алыр дээш бүгү-ле чүвени кылып турар үеде, ол дыка чугула. Кандыг-даа бергелерни чүгле кады ажып эртип шыдаар бис» - деп, Владислав Ховалыг чугаалаан.
Республиканың Баштыңы Тываның болгаш Россияның хөгжүлдезинге үлүг-хуузун кииргени дээш бүгү чурттакчы чонга өөрүп четтиргенин илереткен.
Владислав Ховалыг хемчегниң киржикчилеринге болгаш шаңнал алганнарга быжыг кадыкшылды, чечектелиишкинни, амыр-тайбыңны, чаагай чорукту күзээн.
Россияның Президентизи Владимир Путинниң чарлыы-биле өөредилге адырында ачы-хавыяазы болгаш хөй чылдарда ак сеткилдиг ажылы дээш, «Россия Федерациязының алдарлыг башкызы» хүндүлүг атты Сүт-Хөл кожууннуң Бора-Тайга ортумак ниити билиг школазының орус дыл болгаш литература башкызы Розалия Бораевна Кууларга тывыскан.
Кызыл хоорайга IV-кү делегей чергелиг сарыг шажын шуулганын организастаарынга болгаш эрттиреринге киирген үлүг-хуузу дээш, Промсвязь банкының Тыва салбырының эргелекчизи Орлан Дажиевич Ооржакка Тыва Республиканың Баштыңының Өөрүп четтириишкинин чарлаан.
Өөредилге адырында ачы-хавыяазы болгаш хөй чылдарда ак сеткилдиг ажылы дээш, Тыва Республиканың Баштыңының Чарлыы-биле «Тыва Республиканың өөредилгезиниң алдарлыг ажылдакчызы» хүндүлүг атты Эрзин кожууннуң Эрзин суурда «Хензигбей» 1 дугаар уруглар садының улуг кижизидикчи башкызы Любовь Шагдыр-ооловна Баткарга тывыскан.
Культура болгаш уран чүүлге чедиишкиннери болгаш хөй чылдарда ак сеткилдиг ажылы дээш «Тыва Республиканың алдарлыг ажылдакчызы» хүндүлүг атты Таңды кожууннуң Максим Монгужукович Мунзук аттыг Межегейниң уруглар уран чүүл школазының «Хөөмей» клазының башкызы Радик Семенович Мунзукка тывыскан.
Хоойлу-дүрүмнү болгаш корум-чурумну быжыглаарынга чедиишкиннери болгаш хөй чылдарда төлептиг ажылы дээш «Тыва Республиканың алдарлыг юризи» хүндүлүг атты Тыва Республиканың Дээди Хуралының (парламентизиниң) Конститусчу-эрге-хоойлу болгаш тус чер бот-башкарылга политиказының талазы-биле комитеттиң даргазы Людмила Леонидовна Осмоловскаяга тывыскан.
Өөредилге адырында чедиишкиннери болгаш хөй чылдарда төлептиг ажылы дээш «Тыва Республиканың өөредилгезиниң алдарлыг ажылдакчызы» хүндүлүг атты Сүт-Хөл кожууннуң өөредилге эргелели муниципалдыг методиктиг албан чериниң удуртукчузу Лидия Семис-ооловна Ондарга тывыскан.
Хоойлу-дүрүмнү быжыглаарынга, хамаатыларның эргелерин болгаш сонуургалдарын камгалаарынга ачы-хавыяазы, хөй чылдарда ак сеткилдиг ажылы дээш «Тыва Республиканың алдарлыг юризи» хүндүлүг атты «Трансконсалтинг» болчукчулар кабинединиң адвокады Афанасий Николаевич Трояковка тывыскан.
Чылгы мал ажыл-агыйын болгаш аът спортун хөгжүдеринге бедик үре-түңнелдери дээш «Тыва Республиканың аът чарыжының алдарлыг мастери» хүндүлүг атты Сүт-Хөл кожуунда хуу сайгарлыкчы болгаш тараачын-арат ажыл-агыйының баштыңы Монгуш Амир Өлзей-ооловичиге тывыскан.
Кадык камгалал адырында ачы-хавыяазы болгаш хөй чылдарда бердинген күш-ажылы дээш «Тыва Республиканың кадык камгалалының алдарлыг ажылдакчызы» хүндүлүг атты Эрзинниң төп кожуун эмнелгезиниң кезиишкин кабинединиң эмчи сестразы Ижигин Уран Бадарчыевнага тывыскан.
Россияның онза байдалдар яамызының Тыва Республикада кол эргелелиниң девискээр эргелелиниң даргазының оралакчызы (Тыва Республиканың биче суднолар талазы-биле кол күрүне инспектору) Владислав Юрьевич Солонцов өртке удур албанның хөгжүлдезинге киирген үлүг-хуузу, бедик мергежили база сыныш чок албан-хүлээлгези дээш «Тыва Республиканың алдарлыг өрт өжүрүкчүзү» хүндүлүг атка төлептиг болган.
«Россияның шериг-төөгү ниитилели» бүгү-российжи хөй-ниити-күрүне организациязының регионалдыг политика департаментизиниң директору Аяна Алексеевна Шойгуну күрүне эрге-чагырга органнарынга хөй чылдарда үре-түңнелдиг ажылы, аныяктарның патриотчу кижизидилгезинге идепкейлиг ажыл-чорудулгазы дээш, «Тыва Республиканың мурнунга ачы-хавыязы дээш» Тыва Республиканың медалы-биле шаңнаан.
«Элита» КХН-ниң директору Ваан Геворкович Андрасянны Тыва Республиканың социал-экономиктиг хөгжүлдезинге үнелеп четпес үлүг-хуузу болгаш хөй чылдарда үре-түңнелдиг ажылы дээш «Тыва Республиканын мурнунга ачы-хавыяазы дээш» Тыва Республиканың медалы-биле шаңнаан.
Улуг-Хем кожуундан 50 ажыг чыл кады чурттап чоруур өг-бүле Владимир Иванович биле Евдокия Григорьевна Буянкиннерге, ол ышкаш Кызыл кожуундан 60 ажыг чыл кады чурттаан Виктор Сааяевич биле Валентина Самдыновна Дандарларга өг-бүлениң үнелиг ыдыктарын кадагалап, өг-бүле институдун быжыглааны дээш, «Өг-бүлениң үнелиг чүүлдерин кадагалап арттырганы дээш» Тыва Республика медальдарын тывыскан.