Хүндүлүг сибирьжилер! Хүндүлүг чаңгыс чер чурттуглар! Чоннуң чаңгыс деминиң хүнү – күрүне байырлалы -биле сеткилим ханызындан байыр чедириишкинин хүлээп ап көрүңер!
Бистиң чонувустуң төөгүлүг сактыышкынында бо хүн онзагай черни ээлеп турар. Аңгы-аңгы ук-ызыгуурлуг, шажын-чүдүлгелиг, язы-сөөктүг өгбелеривис дайзынны канчаар шиитпирлиг чылча шаап, бодунуң черин, хосталгазын, хамаарышпас чоруун камгалап, мөзү-бүдүштүң угланыышкыны апарганын биске кезээде сагындырып турар.
Сибирь – чоннарның демнежилгезиниң онзагай үлегери-дир. Мында, Алтайның карак четпес шөлдеринден Арктиканың делгемнеринге чедир, он-он чоннарның төлээлери чүс-чүс чылдарда амыр-тайбың, кожа-хелбээ чурттап чоруур. Аңгы-аңгы ужур-чаңчылдарлыг болгаш культураларлыг кижилерни чаңгыс онзагай чүүл каттыштырган – кадыг-дошкун бойдус байдалдарында каңнаттынган шыдамык болгаш сыныш чок чоруктан аңгыда, энерелдиг, бот-боттарын деткижип, дуза кадарынга белен чоруу-биле ылгалып турар сибирьжи мөзү-бүдүш. Ону херек кырында бадыткап турар бис: бистиң кол күжүвүс - бистиң хөй талалыывыста.
Бөгүн, даштыкы политиканың эң-не нарын үелеринде, Россияның чоннарының демнежилгези база катап чугула ужур-уткалыг апарган. Российжи ниитилелди бакташтырып, ону аңгылаштырар дээн оралдажыышкыннарга Россияның хамаатылары чаңгыс болгаш быжыг харыыны берип чоруурун көрүп чор бис.
Сибирь федералдыг округтуң чурттакчылары чурттуң камгалалын болгаш бот-догуннаашкынын быжыглаарынга улуг үлүг-хуузун киирип турар. Сибирьжи полктар кезээде күрүнениң чөленгиижи болуп чораан, амгы үеде тускай шериг операциязының киржикчилери — бистиң дайынчыларывыс ол алдарлыг езу-чаңчылдарны алдар-биле уламчылап, Россия Федерациязының бодунуң хөгжүлделиг оруунга болгаш амыр-тайбың болгаш тургузукчу келир үеже эрге-ажыын камгалажып чоруур.
Тылда волонтерларның карак кызыл ажылында, камгалакчыларның өг-бүлелерин деткииринде, кижи бүрүзүнүң ниити ажыл-херекке үлүг-хуузун киирер дээн изиг күзелинде демнежилге көстүп турар. Россияның технологтуг бот-догуннаашкынын быжыглаарынче угланган чаа бүдүрүлгелерни тудуп, инфраструктураны хөгжүдүп, эртем болгаш өөредилге төлевилелдерин кады боттандырып турар бис.
Россияның чонунуң демнежилгези, хамааты харыысалгазы, эрес-дидим болгаш маадырлыг чоруу – кайы-даа үелерде кандыг-даа дайзынны тиилеп алырынга дузалап чоруур күштүг чепсек-тир. Бөгүн бис Тиилелгеге бүзүрээр бис, чүге дизе алыс шын болгаш чөптүг чорук бистиң талавыста.
Силерге быжыг сибирьжи кадыкшылды, өг-бүлеңерге аас-кежикти, эртенги хүнге бүзүрелди, күчүлүг Ада-чуртувуска бараан болурунга чаа-чаа чедиишкиннерни күзедим! Бажың бүрүзүнге амыр-тайбың, чылыг-чымчак, эп-найырал өктерезин.
Байырлал-биле! Чоннуң чаңгыс деминиң хүнү-биле!
Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев