Бөгүн Россияның Националдар херектериниң талазы-биле федералдыг агентилел партнерлары-биле кады «Улуг этнографтыг диктант» деп XI-ги делегей чергелиг чырыдыышкын акциязын эрттирген. Россияның хамааты бот-тускайлаңын быжыглаарынче, үндезин российжи сүлде-сүзүк болгаш мөзү-шынар ыдыктарын нептередиринче, төөгүнүң хажыдыышкыны-биле демисежиринче хемчегни угландырган. Бо чылын хемчег оффлайн хевирде эртип турар, Тываның чурттакчылары диктантыны 100 шөлчүгешке бижээн.
Кызылдың чурттакчылары бөгүн Орус культура төвүнге, Тыва культура төвүнге, Тыва Республиканың Национал музейинге диктантыны бижиир аргалыг болганнар. Республиканың кожууннарында библиотекаларга, школаларга база шөлдер ажылдаан.
РФ-тиң Президентизи Владимир Путинниң чарлыы-биле доктааткан Россия Федерациязында Чоннарының чаңгыс деминиң чылында 2026 чылдың кол хемчеглер планынче «Улуг этнографтыг диктант» кирген турган.
Чырыдыышкын акциязы ам он бир чыл дургузунда бистиң чуртувустуң аңгы-аңгы регионнарындан улуска боттарының билиглерин хынаар, Россияның чоннарының чаңгыс демниин база культураларынга хүндүткелди быжыглаар – ниити сорулга дээш демнежир арганы берип турар.
Тывада болуп турар хемчегни ТР-ниң Националдар херектериниң талазы-биле агентилел эрттирип турар.
«Эрткен чылдарда диктантыны онлайн болгаш оффлайн хевирге эртип турган. Бо чылын байдал өскерилген: эгезинде ону ийи хевирге эрттирер сүмелер кирген, ооң соонда байдал өскерилген — диктанты чүгле чаңгыс хүнде боду киржир кылыр эрттирер» — деп, агентилелдиң удуртукчузу Светлана Ощепкова тайылбырлаан.
Бо чылдың хемчеглериниң бир онзагай чүүлү - он видео-айтырыглар болган: оларның беш айтырыын тускай шериг операциязының киржикчилери, а өске беш айтырыгны Россияның чоннарының, ооң иштинде Тываның төлээлери салган. Айтырыглар Россияның чоннарының чаңгыс деминиң чылынга тураскааттынган.
Диктантының түңнелдери декабрь 12-де — Россия Федерациязының Конституция хүнүнде билдинер.
Улуг этнографтыг диктантыны эрттирип эгелээнинден бээр 11 чыл дургузунда бүгү Россияда болгаш даштыкы чурттарда 21 миллион ажыг кижи киришкен. Эрткен чылын, юбилейлиг чылда, Тывага 32 муң ажыг кижи диктантыны бижээн.