Тывада регионнуң Тудуг яамызы өскүс болгаш ада-иезиниң хайгааралы чок арткан уругларга, ол ышкаш ол категорияга хамааржыр кижилерге тускайлаттынган чуртталга бажыңнарының фондузун тургузары-биле бо чылда планнаан ажылын доозуп турар. Бо чылын ол категорияларның чурттакчыларын чурттаар оран-сава-биле хандырарынче 297 млн рубльди тускайлаан, ооң 99 хуузу – федералдыг бюджеттен субсидия.
Планнаан акшаландырыышкынның хемчээли-биле, Тере-Хөл кожуундан аңгыда, республиканың шупту муниципалдыг тургузугларынга 82 чуртталга бажыңнарын тудуп, садып алыр. Кызыл, Мөңгүн-Тайга, Тес-Хем, Каа-Хем кожууннарда 74 оран-саваны садып албышаан, сес оран-саваны тудуп турар.
Тудуг яамызының дыңнатканы-биле алырга, бо хүнге чедир 69 чуртталга бажыңнарын өскүс уругларга хуваар кылдыр күрүне өнчүзүнче шилчиткен. «Спутник» микрорайонда чаа чуртталга комплекстеринде аңгы-аңгы шөлдүг 35 квартираны, Чөөн-Хемчик болгаш Кызыл кожууннарда алды-алды, Ак-Довурак хоорайда болгаш Улуг-Хем кожуунда дөрт-дөрт, Бии-Хем, Өвүр, Барыын-Хемчик, Бай-Тайга, Сүт-Хөл кожууннарда ийи-ийи квартиралар садып алдынган. Эрзин, Тожу, Чаа-Хөл база Чеди-Хөл кожууннарда бир-бир квартираларны белеткээн.
Күрүне өнчүзүнче шилчидеринге 11 оран-сава белен: Таңдыда дөрт, Кызыл, Тес-Хем, Мөңгүн-Тайга кожууннарда ийи-ийи, Бай-Тайга кожуунда бир квартира.
Каа-Хем кожуунда ам-даа ийи чуртталга бажыңының тудуу доозулгалак: Тудуг яамызының дыңнатканы-биле алырга, ол ийи объектиде ажылдар 80 хуу четкен.
Тыва Республиканың Өөредилге яамызының тургусканы чурттаар оран-сава алыр эргелиг өскүс уруглар даңзызынга даянып, Тыва Республиканың Тудуг яамызы тускайлаттынган чуртталга фондузун тургузуп турар.
Эрткен чылын өскүс болгаш ада-иезиниң хайгааралы чок арткан уругларны чурттаар оран-сава-биле хандырар дээш, Тыва Республиканың Тудуг яамызы 75 чуртталга бажыңнарын, ооң иштинде Кызылдың чаа «Взлетный» болгаш «Спутник» микрорайоннарда 21 база Кызыл хоорайда чуртталга бажыңнарының ийиги рыногунда 29 квартираларны, ол ышкаш Кызыл кожууннуң Сукпак суурда 24, Сүт-Хөл кожуунда Суг-Аксы суурда бир чуртталга бажыңын республиканың күрүне өнчүзүнче шилчиткенин сагындыраал.