Тываның Кадык камгалал яамызының дыңнатканы болза, республикада 61480 санныг гриппке удур тарылганың ийиги кезээ чедип келген болгаш, ону кадык камгалал организацияларынче дарый үлээн.
Сентябрь ортан үезинде эгелээн республикада тарылга кампаниязы бир ай ажыг уламчылап турар. Сезоннуг гриппке удур тарылгага федералдыг бюджеттен республикага 158475 санныг вакцинаны үлеп берген. Сентябрьның 9-та бир дугаар: улуг улуска «ФЛЮ-М», 6 айдан 3 харга чедир уругларга, диспансер учедунда уругларга, иштиг херээженнерге «Ультрикс Квадри» база уругларга «Совигрипп» деп вакциналар келген.
Роспотребнадзорнуң Тыва Республикада эргелели, октябрь төнчүзүнге чедир 90 муң хире чурттакчыны гриппке удур тараанын дыңнаткан. Эмчилер бо сезоннуң дургузунда 200 муң кижини, ооң санында 93 муң хире уругларны тарыырын планнаан.
Уруглар аразында тарылга кампаниязы шалыпкын чоруп турар: планнаттынган уругларның 79,2 хуузун, ол ышкаш үш харга чедир чаштарны эң хөй хаара туткан. Ниитизи-биле 16556 улуг кижилерге (планның 14,7 хуузу) тарылганы салган, оларның аразында кадык камгалалының 4827 ажылдакчылары (планның 48,7 хуузу), 4780 өөредилге ажылдакчылары (24,4 хуузу), 60 хардан өрү назылыг 2410 кижи (9,5 хуузу), хоочураан аарыглыг 1711 кижи (36,6 хуузу), 1063 иштиг херээженнер (80,7 хуузу), өске-даа адырларның 1555 ажылчыннары (6,4 хуузу), 97 шеригже кыйгыртканнар болгаш 18 хардан өрү назылыг 113 студентилер бар.
Эрткен неделяда республикада 10 муң кижиге онааштыр 19,8 кижи, азы 668 кижи ОРВИ-ден аарааны бүрүткеттинген, эпидемиологтуг деңнелден 55,4 хуу куду. Ооң мурнунда неделяга деңнээрге, аарыыр чоруктуң деңнели 3,7 хуу өскен (644 таварылга, 10 муң кижиге онааштыр 19,1). Республиканың чурттакчы чонунуң аразында грипптен аараан таварылгалар бүрүткеттинмээн.