.webp)
Октябрь 26-дан эгелеп Каа-Хем биле Улуг-Хем кожууннарда паром кежиглер хагдынган. Ол чурттакчылыг черлерже кышкы оруктуң айыыл чок аргыжылгазы организастаттынар. Паром кежиглер Каа-Хем кожууннуң Көк-Хаак, Бүрен-Бай-Хаак, Ильинка, Сизим, Үжеп суурларын база Улуг-Хем кожууннуң Эйлиг-Хем суурун өске чурттакчылыг черлер-биле харылзаштырып турган.
Ам муниципалдыг тургузуглар автотранспорт болгаш чадаг кижилер эртер дош кежиглерни белеткээр ужурлуг. Тываның Чазааның айтыышкыны езугаар, оларны ноябрь 15-ке чедир белеткеп доозар ужурлуг. Ол кежиглерни албан езузу-биле ажыткан соонда оларны ажыглаар. Ол үеге чедир дош кыры-биле чорууру хоруглуг.
Тывага ноябрь 15-тен эгелээр «Чуга дош» деп профилактиктиг акция 2027 чылдың апрель 1-ге чедир уламчылаар. Ооң сорулгазы – күскү-кышкы үеде суг объектилеринге айыыл-халаптарны болдурбазы.
Акция үезинде, муниципалдыг тургузуглар чонга профилактика ажылын чорудуп, суг объектилеринге алдынарының чурумнарын сагындырып, массалыг информация чепсектеринге чогуур медээ материалдарын парладыр. Хемнер болгаш хөлдер эриктеринге сагындырыг демдектерни, ол ышкаш дошче транспорттуң үнерин хораан демдектерни салыр. Чер-черлерде дош кежиглерге болгаш суглуг черлеп хөй кижилер чоруур черлерге күрүнениң автоинспекция ажылдакчылары-биле кады дежурныйлаашкынны организастаар.
Өөредилге албан черлерин, Россияның ИХЯ болгаш ОБЯ-зының Тыва Республикада ажылдакчыларын профилактиктиг хемчеглерже хаара тудар. Школаларга кышкы үеде сугга айыыл чок чоруктуң дүрүмнериниң дугайында беседаларны болгаш кичээлдерни эрттирер. Муниципалитеттерниң административтиг комиссиялары корум-чурум камгалаар органнар-биле кады ажылдап, сугга айыыл чок чоруктуң дүрүмнерин хажыткан таварылгаларны илередир.
Республиканың чурттакчылары агаар-бойдустуң байдалындан, сугнуң агымындан болгаш суг объектизиниң онзагайындан доштуң кылыны хамааржыр дээрзин сактып алыры чугула. Кыры дошталы берген-даа ышкаш болза, ол айыыл чок чорукту магадылавас. Кышкы кежиглерни чүгле албан езузу-биле ажыткан соонда ажыглап болурун билзе чогуур.