Тыва Республиканың Баштыңы Владислав Ховалыг база республиканың чазаа Россия Федерациязының алдарлыг юризи, республиканың Дээди Судунуң даргазы чораан Надежда Чычан-ооловна Күжүгеттиң өг-бүлезинге болгаш эш-өөрүнге ханы кажыыдалын илереткен.
Надежда Чычан-ооловна профессионал улуг оруун Тываның район судунуң судьязындан эгелээш, республиканың Дээди Судун 19 чыл хире даргалап, чуртталгазының 38 ажыг чылын суд органнарынга бараалгаткан.
Ооң чуртталгазы мергежилинге бердингениниң, хоойлуга шынчызының болгаш чонунуң мурнунга харыысалгалыг чоруктуң үлегери апарган. Надежда Чычан-ооловнаның бедик мергежили, шынчы чоруу, мерген угааны, шыңгыы негелдези коллегаларының ханы хүндүткелин чаалап алган. Ол республиканың суд системазының хөгжүлдезинге база ооң ажыл-херээн уламчылап чоруур бүдүн салгалдың шииткекчилерин белеткээринге үнелеп четпес үлүг-хууну киирген.
Кажыыдалдың бо шагында Надежда Чычан-ооловнаны таныыр, үнелеп база хүндүлеп чораан бүгү-ле кижилерниң чидиригниң ажыг-шүжүүн кады үлежип тур бис. Ооң өг-бүлезинге, төрелдеринге, эш-өөрүнге болгаш коллегаларынга быжыг турушту сеткиливис ханызындан күзедивис. Надежда Чычан-ооловна Күжүгеттиң дугайында чырык сактыышкын, ооң амыдыралчы оруу, хоойлу-дүрүмге шынчы бараалгааны, ооң буянныг ажыл-херээ Тываның чонунуң чүректеринге кезээ мөңгеде артар.