Тываның Баштыңы Владислав Ховалыг каайлы ажылдакчыларынга профессионал байырлалы-биле байырны чедирген. Президентиниң чарлыы-биле 1995 чылда тургускан Каайлы ажылдакчызының хүнүн чылдың-на октябрь 25-те демдеглеп эрттирип турар. Республика Баштыңының Макс национал мессенджерде парлаан байыр чедириишкининде, чурттуң экономиктиг сонуургалдарын камгалаарынга болгаш кызыгаарга корум-чурум хажыдыышкыннарын болдурбазынга каайлы ажылдакчыларының чугула ролюн демдеглээн. Ведомствонуң ажылдакчыларынга болгаш хоочуннарынга ажыл-херээнге беридингени болгаш Енисей Сибириниң турум чоруунга киирген үлүг-хуузу дээш өөрүп четтиргенин ол илереткен.
«Чөөн чүкче угланган улуг өскерлиишкиннер үезинде, Тыва кызыгаарлар аразында чаа логистика коридорларын хөгжүдеринче чоорту каттыжып кирип турар. Кызыгаар инфраструктуразын эде чаартып, эрттирилге пунктуларының күчү-күжүн калбартыры регионга экономиктиг перспективаларны ажыдып, Азия чурттары-биле садыг-саарылга харылзаазын быжыглаар ужурлуг» - деп, Владислав Ховалыг демдеглээн.
Чоокта чаа регионнуң чазаанга Сибирьниң каайлы эргелелиниң база Красноярскиниң каайлы чериниң удуртулгазы база Кызылда Красноярскиниң каайлы чериниң начальнигиниң чаа оралакчызы Роман Грибенников-биле ажылчын ужуражылгалар болуп эрткенин сагындыраал. Келир чылда бирги чадазын доозары планнаттынган «Хандагайты» эрттирилге пунктузунуң эде чаартылга айтырыгларын сайгарып чугаалашкан. Регионнуң социал-экономиктиг хөгжүлде программазы езугаар, кызыгаар чоогунга чүък шыгжаарын, сөөртүрүн база каайлы документилерин долдурарын хандырбышаан, бизнеске чугула инфраструктура объектизи апаар каайлы-логистика терминалының тудуу чоруп турар.
Сибирьниң шупту каайлы черлеринде байырлал хүнү-биле байырлыг хемчеглер, концерттер, шаңналдар тыпсыышкыны болуп эрткен. Чурттуң экономиктиг айыыл чок чоруун хандырарынга бедик чедиишкиннери болгаш каайлыжының албан хүлээлгелерин үлегер-чижектиг күүсеткени дээш, каайлы ажылдакчыларынга Россияның Федералдыг каайлы албан чериниң хүндүлүг бижиктерин, өөрүп четтириишкин бижиктерин, медальдарны, хөрек демдектерин тывыскан.
ХХ чүс чылдың эгезинде Үстүү-Усинск суурга Урянхай каайлы чериниң тургустунганындан Тывада каайлы ажыл-херээниң төөгүзү эгелээн. 1921 чылда Таңды-Тыва Арат Республиканы чарлаан соонда, каайлы-үндүрүг эргелели үндезилеттинип, ол 1944 чылда ТАР-ның ССРЭ-ге каттыжып киргенинге чедир ажылдаан.
1992 чылда Россияның Күрүне каайлы комитединиң дужаалы езугаар, Тываның каайлы чери тургустунуп, Сибирьниң каайлы эргелелинде эң аныяаның бирээзи апарган. 2020 чылда ону Красноярскиниң каайлы эргелели-биле кадып, эде тургускан соонда, Красноярск каайлызының Тыва Республика талазы-биле албан чери чери апарган. Амгы үеде Тывада дөрт каайлы постузу ажылдап турар, оларның үжү Моол-биле кызыгаарда: Хандагайты, Цаган-Тологой, Шара-Сур автомобиль эрттирилге пунктулары.
Каайлы албанының специалистери күрүнениң экономиктиг сонуургалдарын камгалаар, федералдыг бюджетти долдурар, хамаатыларның айыыл чок чоруун хандырар, контрабанда болгаш терроризм-биле демисежир чугула ажылдарны хүннүң-не күүседип турар.