Тывада школачыларга күскү дыштанылга эгелээн. Регионнуң Өөредилге яамызы өөреникчилерниң айыыл чок чоруун хандырып, берге байдалда уругларны деткиир дээш ажыктыг болгаш солун дыштанылганы организастаарынче угланган бөлүк хемчеглерни бадылаан. Тодаргайлаарга, беш хонук өөренир школаларга октябрь 26-дан ноябрь 3-ке чедир беш хонуктуң, а октябрь 25-тен ноябрь 3-ке чедир алды хонуктуң школаларынга күскү дыштанылгалар үргүлчүлээр. Улдуңнуң бирги өөредилге хүнү ноябрь 4-түң байырлалынга таваржы берген болгаш, өөреникчилер ноябрь 5-те өөренип эгелээр.
Өөредилге черлеринге айыыл чок чоруктуң ниити тайылбырын эрттирген. «Угарлыг ыштан кичээниңер!», «Комендант шагын сагып тур мен!», «Бажыңымда мен» дээн ышкаш темалыг акцияларны айыыл-халаптарны болдурбас дээш планнаан.
Школа-интернаттарда чурттап турар малчыннар ажы-төлүнге тускай чурумну доктааткан: чүгле ада-иези (хоойлу езугаар төлээлелери) боттары ат салган соонда ажы-төлдү хүлээдип, уткуп алыр.
Аңгы-аңгы профилактиктиг учеттарда өөреникчилерге, амыдыралдың берге байдалынга таварышкан уругларга, ол ышкаш өскүс болгаш ада-иезиниң хайгааралы чок арткан уругларга хууда үделге программаларын тургускан. Дыштанылга хонуктарында ол өг-бүлелерже үнүүшкүннерни организастаар, специалистер уругларның чурттап турар байдалын хынап, чогуур адрестиг дузаны үезинде көргүзер.
Дыштанылга үезинде өөредилге, культура болгаш спорт албан черлеринге түр үениң 342 дыштанылга төптери ажыттынып, хостуг үезин шын болгаш ажыктыг эрттиржип, чаа кичээлдерни шенеп, эш-өөрү-биле харылзажыр арганы бээр.
Элээн каш улуг хемчеглер база планнаттынган. Чижээлээрге, октябрь 30-де болур «Театр – бис» деп республиканың уруглар театр уран чүүлүнүң фестиваль-мөөрейи аныяк артистерниң салым-чаяанын ажыдарынга эптиг шөл болур. Школаларга «Хөм бөмбүк – школачы футбол лигазы» деп бүгү-российжи мини-футбол маргылдаазының шилилге маргылдаалары эртер. Экология болгаш биология талазы-биле сонуургалдыг школачылар «Подрост» деп бүгү-российжи элээдилерге арга-арыг мөөрейиниң регионалдыг чадазынга ырактан киржип база болур.
Октябрь 26-дан 30-ге чедир «Сылдысчыгаш» салым-чаяанныг уруглар төвүнге 5-тен 10 класстар өөреникчилеринге чонар-даш уран чүүлүнге кыска хуусаалыг өөредилег курузу эртер. Немелде өөредилге башкызы, Россия Федерациязының алдарлыг чурукчузу, Россияның Чурукчулар эвилелиниң кежигүнү, улусчу ус-шевер Алексей Кагай-оол кичээлдерге башкылаар.
Оон аңгыда «Авангард» өөредилге-методиктиг төп шериглээр чедип турар элээди оолдарга шериг албанының эге билиглеринге өөредилге чыыжын уламчылаар. Программа октябрьдан декабрьга чедир чоруп турар болгаш беш хонуктуң тос сессиязын киирген. 800 ажыг оолдар аңаа киржир ужурлуг.
Тываның элээн каш кожууннарында чурттакчылыг черлерже адыглар чоокшулап турары-биле бедик серемчилелдиң чуруму күш киргенин сагындыраал. Культурлуг, спортчу, школачы, уругларның массалыг хемчеглерин арга-арыглыг база ооң чоогунда девискээрлерге эрттирерин хораан. Арга-арыг чоогу черлерде чурттап турар чурттакчыларга комендант шагын чарлаан. Ада-иелерге ажы-төлүн каяа-даа үдээрин сүмелээн – назы четпээннерниң хоойлу езугаар камгалакчызы чокка хөй-ниити черлеринге дүне, 21:00 шактан 7:00 шакка чедир чорууру хоруглуг.