Тускай шериг операциязының зоназында база кызыгаар чоогу регионнарда албан даалгаларын күүседип турар российжи шериг албанныгларынга гуманитарлыг чүъктүг машиналар бөгүн Кызылдан орукче аъттаныпкан. Республиканың чурттакчылары, күш-ажылчы коллективтер, бүдүрүлгелер, хөй-ниити организациялары, Тываның муниципалдыг тургузуглары дузаламчы чыылдазынга идепкейлиг киришкен.
Улусчу фронт Тываның Чазааның болгаш республиканың Дээди Хуралының деткимчези-биле, чүък сөөртүлгезин кады организастаан. Бистиң чаңгыс чер чурттугларывыстың албан эрттирип турары Донецк болгаш Луганск Улус Республикалар, Запорожье болгаш Херсон областар, Курск биле Белгород областарже гуманитарлыг чүъктү чедирер.
«Чылдың үезиниң аайы-биле дайынчыларның хеп-сынын дарый чаартыры негеттинип турар болгаш, тылдан үезинде келген дузаламчы дыка херек» - деп, Тываның Баштыңы Владислав Ховалыг МАХ-та бодунуң блогунда демдеглээн.
Бо удаада кол кичээнгейни күскү-кышкы үеде дайынчы даалгаларны күүседиринге херек транспорт болгаш дериг-херекселдерже углаан. Дайынчылар бо удаада 11 автомашина, генераторлар, чылыдыр үрдүрер херекселдер, камуфляж четкилери, газтыг плиталар, ажыл-агый дериг-херекселдери, эмнер болгаш өске-даа чугула херек чүүлдерни алыр. Ол ышкаш чылыг-чымчак сөстерлиг бичии уруглар чагаалары база чеде бээр.
Улусчу фронтунуң регионалдыг салбырының дыңнатканы болза, Тываның 15 муниципалдыг тургузуглары «Бүгү чүвени Тиилелге дээш!» деп күскү акцияда каттышкан. Республиканың чурттакчылары болгаш организациялары дайынчыларга херектиг дериг-херекселдерни дамчыдып, акша-хөреңгини чыгган.
Тываның хамааты камгалал болгаш онза байдалдар албаны – акцияның идепкейлиг киржикчилериниң бирээзи. Албанның 100 ажыг ажылдакчызы «Бүгү чүвени Тиилелге дээш!» деп регионалдыг чыылдаже бир ажыл шагының шалыңын ай санында шилчидер деп шиитпирлээн. Камгалакчылар «Тиилелгениң шагы» деп эгелээшкинге каттыжып, фронтуну доктаамал деткииринче ынчаар үлүүн киирерлер.
Ооң мурнунда албанның ажылдакчылары тактиктиг аптечкалар садып алырынга акша-хөреңгини чыып, Улусчу фронт таварыштыр ону дайынчыларже дамчыткан. Оон аңгыда организацияның өнчүзүнден үндүр бижээн автомашинаны септээш, мурнуку одуругже чоруткан.
«Күш-ажылчы коллективтеривис, хөй-ниити организациялары, бүдүрүлгелер, сагыш човаалал чаңгыс чер чурттугларывыс дузаламчы чыырынга киришкен. Ындыг деткимчениң ачызында 55 тонна чүъктү чыып шыдаптывыс» - деп, Владислав Ховалыг демдеглээн.
Республика Баштыңы шериг албанныгларны деткииринге ниити киржилгениң ужур-дузазын демдеглевишаан, гуманитарлыг ачы-дуза чыылдазынга база ону чорударынга киришкен кижи бүрүзүнге четтиргенин илереткен. Тыва мурнуку одуругда чаңгыс чер чурттугларынга херек бүгү чүүлдер үезинде чеде бээр кылдыр, чурттакчыларның, организацияларның, эрге-чагырга органнарының күжениишкиннерин эвилелдеп турар.