Тываның дөрт херээжен чурттакчызы федералдыг деңнелдиң бедик үнелелин алган. Президентиниң чарлыы-биле, «Россия Федерациязының алдарлыг эмчизи» атты Вероника Кыргыс, Оксана Ооржак, Раиса Чамбал-оолга тывыскан. «Россия Федерациязының культуразының алдарлыг ажылдакчызы» атты Чечена Сувакпит алган.
«Чаңгыс чер чурттугларымның профессионал ачы-хавыяазын ынчаар демдеглээнинге байыр чедирип тур мен!» — деп, Тываның Баштыңы Владислав Ховалыг шаңнал алганнарга төлептиг үнелел-биле байыр чедиргенин бижээн.
Вероника Кыргыс 40 чыл ажыг дургузунда херээжен улустуң кадыкшылын камгалаарынга болгаш иштиг-сааттыг үезин болгаш божуурун чедиишкинниг эртеринге дузалажып чоруур. Акушер-гинеколог эмчи ол чылдар дургузунда божудар эмчи болуп, божудулга салбырларын эргелекчилеп, Тываның Кадык камгалал яамызының акушер-гинекология талазы-биле кол специалистеп, Кызылдың 1 дугаар божудулга бажыңын удурткан. Бөгүнде Вероника Самбууевна республиканың Перинаталдыг төвүнде аарыг кижилерни хүлээп албышаан. Ол «Тыва Республиканың алдарлыг эмчизи», «Россия Федерациязының кадык камгалалының тергиини» бедик аттарның база эдилекчизи.
Оксана Ооржак – медицина эртемнерниң кандидады, республиканың 1 дугаар эмнелгезиниң төпчүткен клиниктиг диагностика лабораториязының удуртукчузу. Ооң удуртулгазы-биле чыл санында 193 аңгы хевирде миллион хире шинчилелдерни кылып турар. Лабораторлуг диагностиканың чаа аргаларын ажыглап, шынарны контрольдаар делегей чергелиг программаларга киржип, республиканың кадык камгалал организацияларынга специалистерни белеткежип чоруур. Оксана Кыргысовна Тываның лаборатория албанының эртем ажылында болгаш сайзыралында киржип турар. Ол 2025 чылда «Эң эки эмчи» бүгү-российжи мөөрейге бирги черни ээлээн.
Раиса Чамбал-оол сагыш-сеткил аарыг кижилерге бүгү назынында дузалажып келген. 1979 чылдан эгелеп республиканың психиатрия эмнелгезинде ажылдап эгелээш, психиатр эмчиден удуртукчузунга чедир ажылдап депшээн. Аарыг кижилерни эмнээшкинин болгаш реабилитациязын сайзыраңгайжыдарынга киржип, кожууннардан коллегаларынга дузалажып, 11 ажыг аныяк эмчи-интерннерни белеткээринге киришкен. Раиса Намчамовна дагдыныкчы ажылче база аныяк специалистерни белеткээринче улуг кичээнгейни угландырган. 2023 чылда «Тыва Республиканың алдарлыг эмчизи» атты аңаа тывыскан.
«Саяннар» национал хөгжүм болгаш танцы театрының директорунуң оралакчызы Чечена Сувакпит ансамбльдиң башкарыкчы артизи болуп хөй чылдарда ажылдаан, башкылап база чоруур. Ол национал ужур-чаңчылдарны кадагалап арттырарынга, культура төлевилелдерин сайзырадырынга, аныяк салгалдың артистерин кижизидилгезинге 30 ажыг чылдарда үлүг-хуузун киирип келген.
Улуг шаңналдарның кайызы-даа – күш-ажылчы чылдарны, профессионал бердинген чорукту, чону дээш сагыш човаашкынны көргүзүп турар. Эмчилер республиканың чурттакчыларының кадыын камгалап карактаарынга дузалажып чоруур болза, культура ажылдакчылары Тываның байлак өнчү салгалын келир салгалдарга камныг дамчыдып чоруур. Күрүне шаңналдары - республиканың болгаш чурттуң амыдыралынга хөй чылдарда оларның киирген үлүг-хуузун бедии-биле демдеглээнинге бадыткал.