Кызылдың мэриязы биле регионнуң кадыг коммуналдыг боктар-биле ажылдаар «ТСП» КУБ операторунуң аразында чарган дугуржулга езугаар, компания 2026 чылдың октябрьдан эгелеп хоорайның хуу секторунда кадыг коммуналдыг бокту чыыр контейнерлер азы урналар салдынган шупту 232 контейнер шөлдерин арыглап эгелээн.
Амгы хоойлужудулга езугаар ол харыысалга регионалдыг операторнуң хүлээлгезинче кирбейн турар, ооң ажылы — Кызылдың хуу секторунда тургускан контейнерлерден болгаш бок чыыр черлерден ону үндүрери. Боктуг контейнерлер чанынга тарадыр октапкан болгаш төктүп каан бокту арыглаары дээрге ол шөлдүң ээзи, бо таварылгада мэрияның хүлээлгези болур. Херек кырында ол чүүл чүс-чүс кудумчу арыглакчыларын болгаш тускай дериг-херекселдерни немей тургузарын негээн муниципалитетке аар чүъктү тургузуп турар берге ажыл. Контейнерлерден бокту доктаамал үндүр сөөртүп турза-даа, ол шөлдерде арткан боктар дээш чурттакчылардан хомудалдар хөй.
Чыгдына берген бок айтырыын доктаамал шиитпирлээри-биле, регионалдыг оператор ол черлерден чыылган бокту үндүр сөөртүрүн харыылаар кылдыр ийи талалар дугуржуп алган. «ТСП» КУБ октябрьның бирги чартыында аргылаашкынны чоруткан. Шупту 232 шөлдү аштап арыглаан. 5 санныг тускай техниканы, ооң иштинде чүдүрер машиналарны, самосвалдарны болгаш бок сөөртүр тускай машинаны ажыглап, бок төгер черлер даштында чыглы берген бокту чыырын организастаан. Кылдынган ажылдың отчедун чуруктар-биле бадыткап, мэрияның хоорай ажыл-агый департаментизинче чоруткан. Регионалдыг операторнуң дыңнатканы болза, хуу секторда шупту шөлдерде чыглы берген боктарны арыглап, августтан бээр дыка хөй ажылдарны кылган.
«Ол шөлдер чоогунда бок-сактың чыглы бергениниң амгы байдалы колдуунда хамаатыларның боттарындан хамааржыр дээрзин утпазы чугула. Бункерлерничашпаннар-биле долдурары азы кожуглуг чедип келгеш, богун азы тудуг материалдарын дүжүрүп кааптар таварылгалар хүн бүрүде бооп турар. Бир эвес чурттакчылар богун шын төп турар болза, хоорайның шөлдерин арыглаарынга регионалдыг операторнуң ачы-дузазы херек чок апаар!» - деп, «ТСП» КУБ-туң директорунуң оралакчызы Родион Тимоходцев ажылды түңнеп тура, демдеглээн.
«ТСП» күрүнениң унитарлыг бүдүрүлгези чаа-ла аштап-арыглап кааптарга-даа багай чүүлдер ам-даа бар: чамдык адрестерге чеде бергеш чыглы берген бокту аштап, чүдүрүп апаарга-даа, ол-ла дораан бок ийи катап көвүдеп каар болган. Чижээ, Семирацкий кудумчузунда 2 дугаарлыг шөлде бункер куруг-даа болза, ийиги хүнде-ле оът-сиген, хүл, улуг хемчээлдиг бок-сак эңдерлип каан болган, а дөрткү хүнүнде кайы хамаанчок төпкен бок овааланы берген чыдар апарган.
Бок чыыр улуг саваже чүгле коммуналдыг кадыг бокту төгер, ынаар оът-сиген, тудуг боктарын чыыры хоруглуг деп, регионалдыг оператор сагындырып турар. Бункер чанынга болгаш ол черлер чоогунда шөлдерге боктар чыыры база хоруглуг, чүге дизе ол чөпшээрел чок бок төгер черлер апаар. Бокту чүгле бункерже төгер, чашпан аймаан, тудуг боктарын, машина дугуйларын октаарда тускай техниканы чагыдып алыр. Ындыг керээни лицензиялыг кандыг-даа организация-биле, ооң иштинде «ТСП» КУБ-биле чарып болур.
Октябрь 17-ден эгелеп оператор ийиги чадаже кирген — шөлдерни эргий кезип тургаш хандырарынче. Арыглаашкын ажылдарын айда ийи катап чорударын планнаан.