Россия Федерациязының Федералдыг Хуралының Федерация Чөвүлелиниң даргазы Валентина Матвиенконуң Хакас Республикага ажыл-агыйжы сургакчылаашкынының үезинде Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев база киришкен. Олар регионда элээн каш социал, культурлуг болгаш спортчу объектилер-биле танышкан.
Хакас Республиканың Боград суурда «Т.И.Ануфриева аттыг Боградтың район эмнелгези» күрүнениң бюджеттен кадык камгалал албан чериниң чаа поликлиниказы-биле таныжары ажыл-албан программазының кол кезээниң бирээзи болган. «Узун болгаш идепкейлиг назын» национал төлевилел езугаар ол объектини эрткен чылын туткан. 2982 дөрбелчин метр шөлдүг оран-савада эмнээшкин-диагностика өрээлдерин, уруглар болгаш улуг улус салбырларны аңгылаан. Албан чериниң төлевилел күчү-күжү - бир ээлчегде-ле 170 кижини, ооң иштинде 40 хире уругларны хүлээп алыр.
Делегация 1490 дөрбелчин метр ниити шөлдүг 30 оруннуг эмнелгениң тудуун база хынаан. Амгы үеде модульдуг тудугну чыып дооскан, ол ышкаш бо хүнге чедир 456 дериг-херекселди чедирип, объектини эмнелге техниказы-биле четчелеп турар. Чыдып эмнээр салбырның техниктиг чепсеглээшкини 92 хуу белен, а чаагайжыдылга ажылдары 90 хуу доозулган. 2027 чылдың январьда эмнелгени ажыдар деп планнаан.
Ажыл албанның киржикчилери Сибирьде эң улуг болгаш амгы үениң төөгү-культура төвү – «Л.Р. Кызласов аттыг Хакасяның Национал чурт-шинчилел музейин» сонуургаан. Музейниң фондузунда Хакасияның палеолит үезинден амгы үеге чедир төөгүлүг болгаш культурлуг өнчү-салгалын көргүскен 156 муң ажыг эдилелдер бар. Аалчыларга 4,5–5 муң чылдар бурунгаар кылган даш көжээлерниң археологтуг чыындызын, XVI–XIX чүс чылдарда Барыын Европаның уран чүүлүнүң доктаамал делгелгезин база Дайынчы алдарының залын көргүскен.
Оон аңгыда, бүрүн эргелиг төлээ Хакас Республикага ажылчын сургакчылаашкын үезинде, Хакас Республикада эң улуг спортчу объекти болур Н.Г. Булакин аттыг спорт комплекинга база чораан. Комплекске хөй талалыг спорт залы, бассейн, чиик атлетика шөлү база административтиг тудуг бар. Ооң баазазында күш-культуржу-кадыкшылга болгаш спортчу хемчеглер доктаамал эртип турар.
Россия Федерациязының Президентизи Владимир Путинниң шиитпири-биле 2025 чылда эгелээн «Күш-культура болгаш спорттуң хөгжүлдези» күрүне программазы-биле 2027 чылда хөй талалыг спорт шөлүнге улуг чаартылга ажылдарын планнаан. Бо чаартылга ажылдары спортка, ооң иштинде кадыкшылы кызыгаарлыг кижилерге таарымчалыг байдалдарны тургузар ужурлуг.
Оон аңгыда Анатолий Серышев Хакас Республикада немелде өөредилгениң «Паралимпийжи курлавыр спорт школазы» күрүнениң бюджет албан чериниң ажыл-чорудулгазы-биле база танышкан. Школа 242 өөреникчини белеткеп турар, оларның 71-и спортчу аттарлыг болгаш разрядтарлыг. Албан чери шимчээри багай, угаан-медерели кемниг, дыңнавас болгаш караа көрбес кижилерге спортчу угланыышкыннарда өөредилге-белеткел кичээлдерин чорудуп турар.
2025 чылда школаның баазазында кадыкшыл байдалы кызыгаарлыг кижилерге болгаш инвалидтерге, ооң иштинде дайынчы хөделиишкиннер хоочуннарынга күш-дамырын катап тургузарынче болгаш социал адаптациязынче угланган, база оларны адаптивтиг күш-культура болгаш спортче доктаамал хаара тударынче угланган көргүзүглүг-чырыдыышкын төвүн ажыткан.
Анатолий Серышев албан чериниң ажылын үнелеп, ооң ажылының чугулазын демдеглээн: школа Хакас Республика биле Россия Федерациязының адаптивтиг спорттуң национал командаларынга спортчуларны белеткеп, ол ышкаш мергежилдиг специалистер командазы белеткел ажыл-чорудулгазында хаара туттунган. Чалыы спортчулар спортка бердингенин көргүзүп, албан езузунуң маргылдааларынга киржип, регионнуң болгаш чурттуң адын камгалап турарын бүрүн эргелиг төлээ демдеглээн.
Анатолий Серышевтиң чугаазы-биле алырга, Президент Владимир Владимирович Путин чаңгыс эвес удаа онзалап демдеглээни ышкаш, ындыг чижектер кадыкшылы кызыгаарлыг кижилерниң тура-соруун күштелдирип, оларның бот-башкартынылгазынга байдалдарны тургузары кайы хире чугулазын тода көргүзүп турар. «Моон соңгаар бо спортчу школа ышкаш шөлдерни чоорту көвүдедирин деткип, округтуң шупту регионнарынга адаптивтиг спорт-биле кичээлдээр аргаларны чедип алыр системалыг ажылды тургузар бис» - деп, бүрүн эргелиг төлээ демдеглээн.
Россия Федерациязының Президентизиниң Сибирь федералдыг округта бүрүн эргелиг төлээзиниң чанында чөвүлелдиң бо неделяда Красноярск хоорайга болур хуралынга, адаптивтиг күш-культура болгаш адаптивтиг спорттуң хөгжүлдезин чугаалажыр. Ооң киржикчилери маргылдааларга белеткелче болгаш кадыкшылы кызыгаарлыг кижилерни спортче калбаа-биле хаара тудар хемчеглер комплекизин хевирлээрлер.
Анатолий Серышев ажыл албанының үезинде «Ада-чурт камгалакчылары» күрүне фондузунуң Хакас Республикада салбырының ажылы-биле таныжып, албан чериниң ажылдакчылары база ында келген кижилер-биле чугаалашкан.