Тывада казыыр сооктар дүшкени-биле кыштың нарын байдалдарынга белеткелди күштелдирген. Баш бурунгаар медээ-биле алырга, республикага секундада 20 м чедир күштүг хаттар, дүвүлүг шуурганнар болгаш тайгактаар чадавас. Тываның Баштыңы Владислав Ховалыг байдалды доктаамал хагааралга алыр даалганы чогуур албан черлеринге берген.
«Ведомство бүрүзү байдалды доктаамал контрольдап, бүгү-ле өскерлиишкиннерни дарый дыңнадырын дилээр-дир мен. Орук албан черлериниң ажылынче онза кичээнгейни угландырар херек» - деп, регионнуң баштыңы аппарат хуралында чугаалаан.
Регионнуң орук-транспорт сайыды Шораан Чыргал-оолдуң дыңнатканы болза, республиканың орук албан черлери кышкы ажыл шагынче шилчээн. Регионалдыг орук четкизинде 19 керээ организациялары база федералдыг 1 орук-тудуг чери хаара туттунган. Подрядчылар оруктарны хүннүң-не хайгаарап турар, а херек апарза, тускай техниканы дүрген-не девискээрлерже чорудуп турар.
Ажыл хүлээникчизи хүннүң-не оруктарга партурльдап, херек апарганда участоктарже тускай техниканы дарый чорудуп болур.
Бедик арттар кырынга, дайгыр орук участоктарынга чажар 6821 тонна дошка удур материалдарны белеткээн. Агаар-бойдус хенертен сооп кээрге оруктарга ажыглаар немелде 70 тонна довурак-дус холумактыг бүдүмелди немей белеткээн. Ажылчыннарның үнүүшкүннүг ажылдарын хандырарынга 653,5 тонна хемчээлдиг хөмүрнү курлавырлаанын чогуур ведомство дыңнаткан.
Кышкы үеде оруктарны ажаап-тударынга шупту 188 санныг тускай техника белен. Кывар-чаар материалдар кырлавырын тургускан: 12,3 тонна бензин, 63 тонна дизельдиг одаар чүүл, үш тонна хире дизельдиг үс бар. Грейдер бистеринге чогуур курлавырларны белеткээн.
Орук албан черлери кыш дургузунда хайгааралды күштелдирип, оруктарда байдалды анализтеп, берге байдалга таварышкан кижилерге дуза чедирерин уламчылаар. Агаар-бойдус баксырай бергенде, муниципалитеттер болгаш ОБЯ-биле кады чонга дүрген дамчыдарын организастаар. Херек апарза, оруктарга түр када шимчээшкинни кызыгаарлаар.
Арт кырының участоктарынче онза кичээнгейни угландырар. Муниципалдыг тургузугларның медээзи-биле алырга, техника аймаа арт кыры черлерде арыглаашкын ажылын чорудуп турар.
«Амгы үеде республиканың орук албан черлери штаттыг чурум езугаар ажылдап турар. Амдыызында кезээде белен чорук чуруму кииртинмээн: айыыл чок аргыжылганы хандырарынга бар күштер болгаш курлавырлар четчир. Автомобиль оруктарында, ооң иштинде арт кырының участоктарында, аргыжылга чогумчалыг хевээр арткан» - деп, Шораан Чыргал-оол түңнээн.