«Энерел сеткил – амыдыралдың нормазы» деп федералдыг программаже регионну кииреринге кол базым болур #МЫВМЕСТЕ деп бүгү-российжи шимчээшкинни хөгжүдериниң талазы-биле ийи хонуктуң стратегтиг сессиязы Кызылга доозулган. Тываның Чазаа биле «Добро.рф» ассоциацияның аразында дугуржулгага атты салырының мурнунда ол хемчегни эрттирген.Бирги хүнде хөй-ниити организацияларының төлээлери, студентилер, аныяктар ажылының талазы-биле специалистер федералдыг эксперттер-биле кады 2030 чылга чедир Тывага эки турачы чорукту системалыг хөгжүдеринче угланган тодаргай төлевилелдерни ажылдап кылганнар. Ийиги хүнде секторлар аразының кады ажылдажылгазын быжыглаарын чугаалашкан: «Добро.рф»-тиң ажылдакчылары, ооң иштинде «Волонтер-эмчилер», «Тываның буянныг чүректери», «Тиилелгениң волонтерлары», «Улусчу фронт» болгаш «Баштайгыларның шимчээшкини» деп аныяктарның кол шимчээшкиннериниң удуртукчулары база Тываның күрүне университединиң төлээлери-биле кады боттандырар төлевилелдер угланыышкыннарын тодараткан.
Ажылдар чүгле найысылалга эвес, кожууннарга база эрткен: «Добро.центр» видеоконференц-харылзаага Барыын-Хемчик кожуун коштунган болза, волонтер ажыл-чорудулгазын деткиир сайзыраңгай инфраструктуралыг Бии-Хем кожууннуң Туран хоорайже үнүүшкүннү организастаан.
«Бистиң регионувус «Энерел сеткил – амыдыралдың нормазы» деп программаны эгелеп турар шенелде девискээрлерниң ийиги чалгыынче кирген. Бо чүүл Тывада эки турачы чоруктуң бедик деңнелин бадыткап, бистиң аныяктарывыска чаа аргаларны ажыдып турар. Бо угланыышкынга ажылдар ам-даа уламчылаар» - деп, «Тываның буянныг чүректери» хөй-ниити аныяктар шимчээшкининиң даргазы Артыш Монгуш демдеглээн.
Программаның күүселдези немелде курлавырларны хаара тудуп, чаа удуртукчуларны өөредип, республикада эки турачы эгелээшкиннерни деткиир чаңгыс аай экосистеманы тургузар.