Тыва Республикада биче суурларже күш-культура болгаш спорт адарында тускай мергежилдиг специалистерни хаара тудар сорулгалыг «Көдээ черниң тренери» программаның боттаныышкыны уламчылап турар. Бо хүнге чедир программа күүселдези езугаар 22 тренер башкылар ажылда тургустунган. Ам-даа ийи ажылчын олут ажык арткан.
«Президентиниң даалгазы-биле эгелээн «Көдээ черниң тренери» программа баштайгы көскү түңнелдерни көргүскен. Бо хүнге чедир Тываның биче суурларында 22 тренер башкылар ажылдап чеде берген. Амгы үеде тус черниң аныяктары сумо болгаш футболдан эгелээш, баскетбол болгаш волейболга чедир спорттуң аңгы-аңгы хевирлеринге профессионал белеткелди эртип болурлар» - деп, Тываның Баштыңы Владислав Ховалыг демдеглээн.
Ук программа республикада 2026 чылда ажылдап эгелээн болгаш, «Россияның спорту» күрүне программазы-биле боттанып турар. Ооң кол сорулгазы – көдээ черлерже мергежилдиг тренер кадрларны хаара тудары, уруглар болгаш аныяктарны профессионал спорт-биле хандырар арганы бээри, массалыг спорттуң хөгжүлдезинге байдалдарны тургузары.
Чаңгыс катап 1 млн рубль хемчээлдиг төлевир алыр программаның киржикчилери беш чылдан эвээш эвес профессионал стажтыг болур ужурлуг. Ындыг деткимче хемчээ биче хоорайларже специалистерни хаара тударындан аңгыда, оларның ол черлерге артып каарын хандырар ужурлуг.
«Көдээ суурларны кадрлар-биле хандырары – республикага кол базым. «Россияның спорту» күрүне программазының көргүзүглерин ынчалдыр күүседип турар бис. 2030 чылга чедир чурттакчыларның 70 чедир хуузун доктаамал күш-культураже хаара тудары – бистиң мурнувуста сорулга ол. Шынарлыг инфраструктура болгаш арга-дуржулгалыг тренерлер Тываның булуң бүрүзүнде спортту езулуг-ла массалыг болгаш чедингир кылып турар» - деп, Владислав Ховалыг демдеглээн.
Амгы үеде программада ийи ажылчын олуттар хостуг. Программага киржирде күш-культура болгаш спорт талазы-биле ортумак профессионал азы дээди эртемниг болуру чугула.