Новосибирск хоорайга Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев биле Россия Федерациязының хамааты камгалал, онза байдалдар болгаш айыыл-халаптар чайладыр талазы-биле сайыды Александр Куренковтуң аразында ажылчын ужуражылга болган.
Аңаа онза байдалдарның үнүп келиринден эгелээш, коммуналдыг четкилерге айыыл-халапты болдурбас болгаш чайладыр, инфраструктураның техниктиг чепсеглээшкини болгаш чогуур ачы-дузаларны чурагайже шилчидеринге чедир, хөй-ле айтырыгларны сайгарган. Ужуражылганың киржикчилери Сибирь регионнарынга күскү-кышкы сезонга белеткелче база ону эртиреринче онза кичээнгейни углаан. Бүрүн эргелиг төлээ бо айтырыгны онза кичээнгейде алган.
Россияның ОБЯ-зының удуртукчузу ведомство Сибирь регионнарында турумчаан кезектерниң инфраструктуразын доктаамал быжыглап турарын демдеглээн. Кольцово ажылчын суурда чурттакчыларны камгалаар чаа өрт кезээн болгаш «Сибирьниң дээрбектээн фотоннар дөзү» коллективтиг ажыглаашкын төвүнге өртке удур камгалалды хандырар чаа өрт станция ажыттынганын дыңнаткан. 17 санныг амгы үениң тускай техниказын дамчыдып берген. Александр Куренков Омск облазында кезектерже 16 санныг өрт-камгалал техниказын база эжиндирер чүүлдерни дамчытканын чугаалаан.
Эки турачы өртчүлер саны немешкени демдеглеттинген. Амгы үеде округда 35 муң ажыг кижиден болгаш 3 муң ажыг дериг-херекселден тургустунган 6 муң хире каттыжыышкыннар ажылдап турар. Округтуң федералдыг субъектилеринге суг үеринге удур хемчеглерни, ооң иштинде октаттынган суггат тудугларын илередир, ол ышкаш оларның айыыл чок чоруун хандырар планнарны ажылдап кылганын үнелээн. Сөөлгү беш чылда ниитизи-биле округда октаттынган гидротехниктиг тудуглар саны 3,4 катап эвээжээн – 149-тан 43 чедир.
Ол ышкаш ужуражылга үезинде, онза байдалдардан Сибирь регионнарының камгалалын бедидер, өртчүлер болгаш камгалакчыларның материал-техниктиг баазазын чаартыр, онза байдалдар уржуктарын чайладырынга федералдыг болгаш регионалдыг албан черлериниң ажылын дүүштүрер айтырыгларны база сайгарган.
Россияның ОБЯ-зының территориалдыг органнарынга даалгалар хемчээли көвүдезе-даа, оларны чедиишкинниг шиитпирлеп турарын бүрүн эргелиг төлээ демдеглээн. «Чаа камгалал техниказын садып ап, онза байдалдардан чурттакчы чонну болгаш девискээрлерни хайгаарап, камгалаар, өртке удур айыыл чок чорукту хандырар, суг объектилеринге айыыл-халаптарны болдурбас дээш, амгы үениң кижи чок ужудукчу аппараттарын идепкейлиг ажыглааны аңаа дузалааны чугаажок. Хамаатылар-биле профилактиктиг ажылче улуг кичээнгейни угландырганы, көрүп турарывыс-биле алырга, көскү үре-түңнелди берген» - деп, Анатолий Серышев демдеглээн.