«Победа» спортчу-культура төвүнге тускай шериг операциязының үезинде албан хүлээлгезин күүседип тургаш мөчээн дайынчыларның өг-бүлелеринге волейбол маргылдаазы болуп эрткен. Маргылдага Ада-чурт камгалакчыларының авалары, ачалары, акылары, угбалары болгаш өске-даа чоок төрелдерин каттыштырган 52 өг-бүле командазы киришкен.
«Ада-чурт камгалакчызы» фондунуң Тывада регионалдыг салбыры маргылдааны организастап эрттирген. Хемчегниң кол сорулгазы – мөчээн дайынчыларның дугайында сактыышкынны кадагалап арттырары, оларның өг-бүлелерин деткиири, спортчу хемчегге кады киржилге дамчыштыр өг-бүле харылзааларын быжыглаары болган. Тываның Баштыңы Владислав Ховалыг камгалакчыларның өг-бүлелеринге маргылдааның онза ужур-утказын демдеглээн.
«Спортчу рекордтар эвес, а дайынчыларның маадырлыг чоруунуң дугайында дириг сактыышкынны артырары – мында эң кол. Бөгүнде волейбол шөлү камгалакчыларның өг-бүлелерин мөөңнеп, олар чааскаан эвес дээрзин көргүзер шөл болган. Бо эгелээшкин дээш чаңгыс чер чурттугларывыстың өг-бүлелеринге мөгейип, четтиргенивисти илередип тур бис. Тыва бодунуң оолдарын сактып, оларга чоргаарланып чоруур» - деп, республика баштыңы демдеглээн.
Маргылдааның түңнелинде, Кызылдан Далаа Дадар Николаевичиниң өг-бүлезиниң командазы бирги черни алган. Бай-Тайга кожуундан Делег Байыр Балыкчыевичиниң командазы ийиги черни ээлээн болза, Кызыл кожууннуң Баян-Кол суурдан Ондар Сылдыс Орлановичиниң командазы үшкү черге төлептиг болган.
Далаа Дадарның өг-бүлези чоок кижизиниң ынак спорту - волейбол маргылдаазы таварыштыр мөгейиг-сактыышкынны кылганнар. Дадар мотоадыгжы батальоннуң халдаашкын ротазынга адыгжы-сапёр бооп албанын эрттирген анаа дайынчы. 2024 чылдың январьда ол бодунуң күзели-биле керээни чаргаш, тускай шериг операциязының зоназынче аъттанган. 2024 чылдың майда ол мөчээн. Мөчээниниң соонда Эрес-дидим чорук ордени-биле шаңнаткан.
Дадар Тес-Хем кожууннуң Берт-Даг суурда өг-бүлезиниң алдыгы боорда, хеймер төлү кылдыр төрүттүнген. Шериг албанының соонда, экскаватор башкарыкчызы болуп ажылдаан. Хостуг үезинде хүрежип, волейболдаар чораан.
Ооң дуңма, акыларының ажы-төлүнден өг-бүлениң командазы тургустунган. Чоок төрелдери болур 20 ажыг кижи: ооң ачазы, кадайы, ажы-төлү, акылары, оларның кадайлары командазының киржикчилерин деткиир дээш чыглып келген. Дадарның дугайында сактыышкынны кадагалап, бот-боттарын деткижип чорууру – шөлге чыглып келген төрелдериниң ниити сорулгазы болган.
Маргылдаа мөчээн шериг албанныгларның өг-бүлелерин чыып, сагыш-сеткилин үлежип, деткимчени эскерер арганы берген. Команда бүрүзүнүң артында чоок кижилериниң эрес-дидими, ынакшылы болгаш шынчы чоруунуң дугайында боттарының улуг төөгүзү шыгжаттынган.