Бөгүн республика Баштыңы Тыва чазааның аппарат хуралынга, регионалдыг сайыттар кабинединде элээн каш кадрлар томуйлаашкынын чарлаан. Владислав Ховалыг бодунуң шиитпирин чарлап тура, кол кадрларны арттырарын чугула деп санаанын демдеглээн.
«Чоокта чаа эрткен соңгулдаларга соңгукчулар идепкейин көргүзүп, чон бистиң угланыышкынывысты бедии-биле деткээн. А ол дээрге бүгү чазактың үре-түңнелдиг ажылы-дыр. Ынчангаш бистиң командавыстың 90 хуузун хевээр арттырар деп шиитпирледим» - деп, Тываның Баштыңы демдеглээн.
Ынчалдыр чаа чазактың составында боттарының албан-дужаалдарын Тыва Республиканың культура сайыды Чигжит Виктор Сергеевич, Тыва Республиканың орук-транспорт комплекизиниң сайыды Чыргал-оол Шораан Александрович, Тыва Республиканың чер болгаш өнчү-хөреңги хамаарылгаларының сайыды Допуй-оол Аян Алексеевич, Тыва Республиканың садыглажылга адырында керээ системазын чурумчудар талазы-биле сайыт Ооржак Чечек Кундаковна, Тыва Республиканың чурагайлыг хөгжүлде сайыды Ховалыг Эдуард Херел-оолович, Тыва Республиканың Дириг амытаннар объектилерин камгалаар күрүне комитединиң удуртукчузу (даргазы) Салчак Артыш Окан-оолович, Тыва Республиканың ажыл-чорудулгазының чамдык хевирлерин лицензиялаар болгаш хайгаараар албанның удуртукчузу Намдан Эртине Юрьевич, Тыва Республиканың Националдар херектериниң талазы-биле агентилелдиң директору Ощепкова Светлана Михайловна кадагалап алганнар.
Тыва Республиканың Саң-хөө-бюджет хайгаарал албанының удуртукчузунуң хүлээлгезин күүседир кылдыр Байыр-оол Белек Викторович томуйлаттырган. Тыва Республиканың хамааты камгалал болгаш онза байдалдар албанының удуртукчузунда Сат Андрей Алдын-ооловичини томуйлаан. Ооң мурнунда Өвүр кожуун чагыргазының даргазынга ажылдап чораан Куулар Айдыс Алексеевич Тыва Республиканың көдээ ажыл-агый болгаш аъш-чем сайыдының хүлээлгезин күүседир. Муниципалдыг албан-дужаалга чедиишкинниг ажылдаары регионалдыг деңнелге дорт депшип ажылдаарынга чада дээрзин регион баштыңы демдеглээн. «Черге» бодунуң ажылдап шыдаарын көргүскен удуртукчулардан команданы чыып тургузар курс томуйлаашкыннарны бадыткан. Бо томуйлалга бадыткаттынган удуртукчуларның удуртукчу командазын тургузарының хүлээлгезин бадыткап турар. Көдээ ажыл-агый сайыды чораан Юрий Делгер-оолович Оруспай Тыва Республиканың ветеринария албанының удуртукчузунуң хүлээлгезин күүседир кылдыр томуйлаткан.
«Чоокта чаа Россияның көдээ ажыл-агый хайгааралының Хакасия биле Тывада эргелелиниң удуртукчузу Геннадий Ульчугачев-биле ужурашкаш, кызыгаар чоогу регионда эпизоотиктиг байдал-биле холбашкан айыылдарны база чугаалаштывыс. Мал ажыл-агый адырында хөй чылдарда ажылдаан байлак арга-дуржулгалыг Юрий Делгер-ооловичини ында томуйлааны, ооң профессионал билиг-мергежилинге даянган кадр шиитпири болур» - деп, Тываның Баштыңы чугаалаан.
Владислав Ховалыг ооң мурнунда сайыттың бирги оралакчызы албан-дужаалды ээлеп чораан Ондар Сылдыс Дүрген-ооловичини Тыва Республиканың күш-ажыл болгаш социал политика сайыды албан-дужаалга ажылдаар, а Түлүш Буянзак Мергеновичини Тыва Республиканың спорт сайыдының хүлээлгезин күүседир кылдыр томуйлаар шиитпирлерни үндүрген. Саң-хөө яамызының, Юстиция яамызының, Кадык камгалал яамызының, Арга-арыг яамызының, Күрүнениң чуртталга-коммунал ажыл-агый инспекциязының болгаш Тариф албанының удуртукчулары ышкаш, спорт сайыдының кордакчызы федералдыг күүсекчи эрге-чагырганың чөпшээрелин алыры албан, томуйлаашкыннар ам-даа уламчылаар.
«Кижи бүрүзү бүгү күжү-биле ажылдаар дээрзинге бүзүреп тур мен» - Владислав Ховалыг кадр шиитпирлерин чарлаан соонда, айыткан.
База ол ышкаш, Тыва Республиканың Чазааның Даргазының оралакчыларын томуйлаарда, конститусчу негелделер езугаар, республиканың Дээди Хуралы-биле (парламентизи) дугуржулга езугаар тургустунган чурум-биле болуп эртер.