Октябрьның 16-да, орук ажылдакчыларының хүнүнүң бүдүүзүнде, Тыва республиканың орук ажыл-агыйының тургустунганындан бээр 90 чыл оюн демдеглеп эрттирген. Тываның Баштыңы Владислав Ховалыг Виктор Көк-оол аттыг Национал хөгжүм-шии театрынга байырлыг хемчегге киришкен. Адырның ажылдакчыларынга болгаш хоочуннарынга профессионал байырлалы болгаш юбилейи-биле ол байырны чедирген.«Республиканың оруктары –хөгжүлдениң стратегтиг угланыышкыны. Ол чоннуң амыдыралының чаа шынарының болгаш айыыл чок чоруунуң, амгы үениң кадык камгалалының, өөредилгениң, культураның база спорттуң чедингирин көргүзүп турар. Экономиктиг хөгжүлдениң болгаш сайгарлыкчы чоруктуң шапкын өзүлдезиниң шимчедикчизи-дир. Орукчулар Чугула сорулганы күүседип турар – чаа аргаларны тургузуп, чаңгыс чер чурттугларыңарны каттыштырып турар силер» - деп, регионнуң удуртукчузу байры чедириишкининде демдеглээн.
Тываның орук ажылдакчылары амгы үениң бедик шынарлыг техниказы болгаш технологиялары-биле орукту тудуп-септээриниң үезин кызырып, ооң бүзүрелдиин болгаш быжыын хандырып турар. Республика «Айыыл чок болгаш шынарлыг автомобиль оруктары» база «Амыдыралга инфраструктура» национал төлевилелдерге киришкенинден, чурттакчы чоннуң аргыжар орук четки көзүлдүр экижээн. Чурттакчылыг девискээрлерни кол транспорт четкизи-биле харылзаштырган чугула инфраструктуралыг турум транспорт судалы тургустунган. Сөөлгү чылдарда чүс-чүс километр оруктарны, он-он көвүрүглерни тудуп, септээн.
«Дыка хөй чүүлдер кылдынган. Ол түңнелдер республиканың чурттакчыларынга көскү. Орук четкизин экижидер болгаш транспорт угланыышкыннарын хөгжүдер талазы-биле улуг планнар ам-даа мурнувуста. Кол-ла чүүл - темпини кошпатпас херек! » — деп, Владислав Ховалыг түңнээн.
Орук-транспорт адырның хөгжүлдезинге онза үлүг-хуузун киирген ажылдакчыларга болгаш хоочуннарга Тываның Баштыңының күрүне шаңналдарын тывысканы байырлалдың онзагай кезээ болган.
Тываның Баштыңындан өөрүп четтиргенин илереткен бижиктерни – «Строй-экспресс» КХН-ниң чиңгине директорунуң оралакчызы Каң-Болат Кунучап; «Орук-тудуг транспорту» КХН-ниң автопогрузчик чолаачызы Артем Шабанов; «Ак-Довурактың орук тудуг-септелге эргелели» КХН-ниң участок мастери Чаян Монгуш; Тыва Республиканың орук эргелелиниң чер болгаш өнчү хамаарылгалар килдизиниң 1-ги категорияның инженери Аяна Монгуш; «Орук-тудуг транспорту» КХН-ниң чолаачызы Сергей Ядыкин; «Ак-Довурактың орук тудуг-септелге эргелели» КХН-ниң орук ажылчыны Артыш Сарыглар; «Восток» КХН-ниң төлевилел удуртукчузу Анвар Додхоев алганнар.
Тыва Республиканың автооруктар эргелелиниң кол инженери Күдер-Кежик Сатты база «Восток» КХН-ниң чиңгине директорунуң бирги оралакчызы Сергей Уюсовты Тываның Баштыңының Хүндүлел бижиктери-биле шаңнаан.
«Ак-Довурактың орук тудуг-септелге эргелели» КХН-ниң кол бухгалтери Аяна Монгуш тудуг адырында хөй чылдарда бердинген ажылы дээш «Тыва Республиканың алдарлыг ажылдакчызы» хүндүлүг атка төлептиг болган.
Орук ажыл-агыйын хөгжүдеринге көскү үлүг-хуузу база хөй чылдарда ак сеткилдиг ажылы дээш күш-ажылдың хоочуну Сергей Пановка «Тыва Республиканың транспортунуң алдарлыг ажылдакчызы» хүндүлүг атты тывыскан.
«ТАР-ның Чазааның хуралында Кызылда Ленин кудумчузун болгаш хоорай кыдыының сай-довурактан чазаглыг оруун 1936 чылдың июнь 1-ге чедир тудар дугайында дужаалы июль 3-те күүсеттинген болгаш ол оруктарга шимчээшкинни эгелеп болур» - деп, «күрүне кызыгаары – Кызыл-Хото» орук тудуунуң начальниги Курбатскийниң болгаш ажылчын комитеттиниң даргазы Хасановичиниң рапортундан Тывада орук тудуунуң хөгжүлдези эгелээн деп санаттынар. Ол-ла чылдың ноябрь 10-да «СОВТУВТРАНС» акционерлиг ниитилелдиң иштинге орук ажыглалының килдизи тургустунган.
Оон бээр эрткен 90 чылдар дургузунда республиканың девискээринде аңгы-аңгы ажыглалдыг болгаш техниктиг категориялыг оруктар четкизи шыптынган. Бөгүнде ниити ажыглалдыг автомобиль оруктарының узуну 5257,4 км четке болза, оларның 378 км федералдыг, 1891,1 км регионалдыг азы муниципалдыг, ол ышкаш тус черниң оруктары 2988,3 км-де.
Автооруктар берге черлерни, ооң иштинде тайга-сыннарны, ыйгылааштарны база Барыын болгаш Чөөн Саяннарны, Таңды-Уула дагларын, Хемчик сынын эртип, Эрзин, Тес-Хем, Өвүр кожууннарның ховуларын таварып эртип турар. Бо бүгү автомобиль оруктарының регионалдыг кол четкизиниң хөгжүлдезинге улуг салдарны чедирип турар.