Тываның Баштыңы Владислав Ховалыг «Чылдың өг-бүлези» бүгү-российжи мөөрейниң «Көдээ өг-бүле» номинациязынга тиилээн Буянды биле Марита Назыннарның өг-бүлези-биле ужурашкан.
Өг-бүле чоокта чаа Москвага байырлыг езулалда шаңналын алгаш, чанып келгеннер. Олар «2026 чылдың өг-бүлези» бүгү-российжи мөөрейниң регионалдыг чадазынга майда тиилээш, июльда федералдыг чадазынга финалистер санынче киргенин сагындыраал. Россияның аңгы-аңгы регионнарындан ниитизи-биле 89 өг-бүле 6 хевирге финалче үнген. Октябрьның 11-ден 14-ке чедир, Москвада Күрүнениң Кремль ордузунга, шаңналдарны тывыскан. Аңаа киржикчилер шаңналдарын алырындан аңгыда, а тиилекчи өске-даа өг-бүлелер-биле таныжып, экскурсиялап, чогаадыкчы ужуражылгаларга киришкеннер.
«Өг-бүле аян-чоруктан дыка хөйнү көрген: Москвага бир дугаар чорааннар, баргаш дораан-на Кремль ордузунга чеде бээрге, оларны бедик деңнелде уткуп алганнар» - деп, Владислав Ховалыг Макс каналынга бижээн. Тывада чарлаттынган Чогаадыкчы күш-ажылдың болгаш өг-бүле ыдыктарының чылында көдээ ишчилер мөөрейге тиилээш, бедик шаңналды алганы ужурлуг деп ол демдеглээн. «Киржикчилеривисти деткиири-биле мөөрейниң бүгү-российжи чадазының тиилекчилеринге 2024 чылда-ла 100 муң рубльдиң чаңгыс катап бээр төлевирин доктааткан бис. Назыннарның өг-бүлези төлептиг шаңналын алганнар» - деп, республика баштыңы немээн.
Назыннарның өг-бүлези – өөнүң ээзиниң ада-иези Николай Наксылович биле Балчармаа Дадарыкпаевнаның угун салгаан тевежилер. Өг-бүле чээрби ажыг чыл дургузунда Бай-Даг сумузунда «Чаа орук» совхозунга теве мал өстүрүп ажылдааннар. Олар малын ынакшыл болгаш сагыш-човаашкын-биле өстүрүп, ажаап-карактап, ажыл-ижинге бүгү бодун берипкеннер. Амгу үеде оглу керни-биле өг-бүле херээн уламчылап, республикада ол чугула адырны хөгжүдүп чоруурлар. Оларның ажыл-агыйында 70 теве бар.
Назыннарның өг-бүлези дөрт кыстыг, дөрт оол база он кыс уйнуктарлыг. Оларның чугаазы-биле алырга, өг-бүлезинге тевелерни кадагалап арттырары – анаа-ла күш-ажыл эвес, а өгбелериниң мурнунга хүлээлгези болгаш келир үеже үлүг-хуузу болур. Олар теве ажыл-агыйының уксаажыдылгазын-даа, ооң культуразын-даа кадагалап арттырары чугула деп санап чоруурлар.
Өг-бүле чылдың-на теве ажыл-агыйынга тураскааткан фестивальдарга, чурук мөөрейлеринге, конференцияларга идепкейлиг киржип турар. Ынчалдыр Назыннарның өг-бүлези улугларындан аныяктарынче билиглерин болгаш ынакшылын дамчып, езу-чаңчылдарны кадагалап арттырган.