Тываның Баштыңы Владислав Ховалыг Россияның Президентизи Владимир Путинниң регионалдыг хүлээп алыышкын черинге хамаатыларга хууда хүлээп алыышкынны эрттирген. Регионнуң удуртукчузунга Алимаа Салчак баштаан «Ирбис» волонтержу даараныр батальоннуң кежигүннери бир дугаарында кирген.
Батальонда шериг албанныгларның авалары ажылдап турар. Эки турачы даараныкчылар удуур хаптар, чеңи-чоктарны, чаштынар четкилерни, идик-хепке тускай ылгавыр демдектерни доктаамал даарап турар. Бо үеге чедир волонтер организациязы даараныр черни хөлезилээр чарыгдалды бодунда алган. Хүлээп алыышкын үезинде, Алимаа Маадыр-ооловна батальоннуң ажылын деткиирин дилээн. Тываның Баштыңының айтыышкыны-биле, ТШО киржикчилериниң хереглелдерин кезээде мурнады күүседип чоруур волонтерларның ажылдаар оран-савазын база чарыгдал материалдарын төлээрин хандырар болган.
«Тускай шериг операциязы төнчүзүнге чедир хөзелилел болгаш материалдар өртээн дуглаар деп шиитпирледим. Ол ышкаш волонтерларның күш-ажылын шаңналдар-биле албан деткиир бис» - деп, Владислав Ховалыг чугаалаан.
Чаш төлүн азырар дээш узун шөлээде олурар хөй ажы-төлдүг ие Айрана Ховалыг – ийиги билдириишкинниң ээзи. Корум-чурум камгалаар органнарның ажылдакчызы, шахматка республиканың чеди дакпыр чемпиону ооң өөнүң ээзи амгы үеде тускай шериг операциязының зоназында албан хүлээлгезин эрттирип турар. Айрана Витальевна өөнүң ээзи-биле үш назы четпээн ажы-төлүн азырап чоруур, ол уругларының бирээзинге чаштар садынче олутту дилээн. Кызылдың мэриязы биле Тываның Өөредилге яамызы дилегни ажылдап көөрү-биле хүлээнип алган.
«Бо айтырыгны чоокку үеде шиитпирлептер бис. Бистиң дайынчыларывыстың өг-бүлелерин база тылдың ишчилерин деткиири кол сорулга бооп артпышаан» - деп, Тываның Баштыңы демдеглээн.
Тываның Баштыңының хууда хүлээп алыышкынынче бижидерде, хамаатылар билдириишкиннерин хүлээп алыр болгаш контрольдаар килдисче, вторник база среда хүннеринде, бижимел билдириишкинни дараазында адреске киирерин сагындыраал: Кызыл хоорай, Красноармейская кудумчузу, 100 дугаар бажың, 100 дугаар кабинет; вторник болгаш средада 9:00 шактан 17:00 шакка чедер; тел.: 8 (394 22) 9-73-77, 8 (39422) 9-73-76.
Азы Тыва Республиканың удур харылзаа шөлү таварыштыр дараазында арында - https://pos.gosuslugi.ru/form/?opaId=216787&utm_source=vk&utm_medium=93&utm_... азы Тыва Республиканың порталында Интернет-хүлээп алыышкын https://amp;7/77/73 таварыштыр киирер.