Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев Барыын-Сибирь демир-орук начальниги Евгений Вейде-биле ажылчын ужуражылганы эрттирген.
Барыын-Сибирь демир-оруу эртип турар девискээрлерде беш регион – Новосибирск, Омск, Кемерово, Томск областарда база Алтай крайда демир-орук магистралының ажыл-чорудулгазын ийи тала ужуражылга үезинде сайгарган. Евгений Вейде бүрүн эргелиг төлээге олар кады ажылдажылга дугуржулгазынга атты шупту салганын дыңнадып, аңаа даянгаш, демир-орук-биле продукция сөөртүлгезин, транспорт инфраструктуразының хөгжүлдезин, чурттакчы чонга демир-оруктап аргыжарының чедимчелиг болурун, ол ышкаш пассажирлерге суурларже аргажылганы организастаарын чедип алганын дыңнаткан.
Барыын-Сибирь демир-оруу Россия Федерациязының демир-орук четкизинде чүък сөөртүлгезиниң хемчээли-биле мурнакчы черни ээлеп турарын демдеглээн. Сан-чурагай-биле алырга, 2026 чылдың тос айында 188,6 млн тонна чүъктү сөөрткен, эрткен чылдың ол-ла үезинге деңнээрге 3,5 хуу хөй. Чүъктүң кол кезиин Кузбасстың хөмүр-дажы, нефть продуктулары, демир болгаш марганец рудазы, кокс болгаш тараа ээлеп турар.
Регионнарда транспорттуң чедингирин хандырарынга Барыын-Сибирь демир-оруу кол черни ойнап турар. 2026 чылдың январьдан сентябрьга чедир 3,6 миллион пассажирлер демир-орук станцияларындан узун оруктарже үнген, 30,3 миллион пассажирлер суурлар аразынга аргышкан.
Регионнарда Барыын-Сибирьниң демир-оруунуң бүдүрүлгелериниң ажыл-чорудулгазынче база оларның экономиканың хөгжүлдезинге ролюнче онза кичээнгейни угландырган. Демир-орук бүдүрүлгелери улуг ажыл берикчизи болгаш үндүрүг төлекчизи болуп турар. Бо чылдың тос айларында регионнарның бюджеттеринче 8,9 млрд рубльди шилчиткен. «Россияның демир-оруктары» ААН регионнарда демир-орук инфраструктуразының, технологиязының, техниказының хөгжүлдезинче 2026 чылда ниити-биле 33,9 млрд рубль инвестицияны салган.
«Чүък болгаш пассажирлер аргыштырылгазының өзүлдези регионнарга улуг инвестициялар, ол ышкаш социал болгаш бюджет талазынга беримчелиг болуру чугула. Кады ажылдажылганың бо хевири федералдыг төптүң, компанияның болгаш округтуң федералдыг субъектилериниң аразында үре-түңнелдиг харылзаазының эки чижээ болур» - деп, бүрүн эргелиг төлээ түңнээн.
Тайылбыр:
Евгений Владимирович Вейде 2004 чылда Сибирьниң күрүнениң транспорт университедин «Транспорт аргыжылгазын болгаш удуртулгазын организастаары» деп мергежилдиг дооскан. Бодунуң күш-ажылчы оруун «Россияның демир-оруктары» ААН-ның Барыын-Сибирь демир-оруунуң Кузбасс салбырының Кемерово-Сортировка станциязынга сигнал берикчизи болуп ажылдап эгелээн. 2026 чылдың сентябрьда «Россияның демир-оруктары» ААН-ның Барыын-Сибирь демир-орук оруунуң начальнигинге томуйлаткан.