Тывада мал чеминиң белеткел кампаниязы долузу-биле доозулган деп, республиканың Көдээ ажыл-агый болгаш аъш-чем яамызы дыңнаткан. Шупту 17 кожуун мал чеми белеткээр планын күүседип, муниципалдыг болгаш республика курлавырларын долузу-биле мөөңнээн.
182666 гектар черден ниитизи-биле 231162 тонна сигенни кезип белеткээн. Планныг онаалданы 221005 тонна чедирип, 105 хуу ажыр күүсеткен. Эрткен чылга деңнээрге, тус черниң чер ажылдыглары ажылдың темпизин 1,1 катап көвүдеткенин яамы демдеглээн. Эрткен чылын мал чеми белеткээр кампания үезинде 217023 тонна сигенни кезип белеткээнин сагындыраал.
Мал чемин белеткээр талазы-биле Таңды кожуун (планын 135 хуу) болгаш Чөөн-Хемчик кожуун (113 хуу) мурнап турганнар. Мөңгүн-Тайга, Улуг-Хем, Тере-Хөл, Бии-Хем, Өвүр, Сүт-Хөл кожууннар боттарының планнарын ажыр күүсеткен. Арткан муниципалдыг тургузуглар планнаттынган онаалдазын долузу-биле кылган.
Республикада сигенниң ортумак дүжүдү гектардан 12,7 центнер чедип, эрткен чылдың көргүзүүнден (гектардан 10,7 центнер) 2 центнер хөй болган. Эң бедик дүжүттү Чеди-Хөл кожуун — гадан 20,4 центнер, Таңды кожуун — 19,9 центнер, Чаа-Хөл кожуун —16,8 центнер, Бии-Хем кожуун — 15 центнерни алганнар. Чөөн-Хемчик, Сүт-Хөл база Бай-Тайга кожууннарда дүжүт гада 14 центнер ашкан.
Сиген кезилдезиниң үезинде ниитизи-биле дөрт муң ажыг кижи киришкен: оларның 682-зи механизастыг бригадалар составынга ажылдаан, а 767-зи хол-биле сигенни кескеннер. Көдээ ажыл-агыйының 2224 санныг техниказын ажыглаан, ооң иштинде тракторлар, кадыырлар, дырбааштар, тырый бастырар база чүък машиналарын хаара туткан.
Көдээ ажыл-агый яамызы агаар бойдустуң байдалын, аграрлыг секторнуң экономиктиг талаларын өөренип көрген мониторингини чорудуп турар. Бүдүрүлге чорудуунга болгаш аай-дедир аргыжылга-сөөртүлгениң өртек-үезинге дорт салдарны чедирер кывар-чаар чүүлдер өртектеринче онза кичээнгейни угландырган.