Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев Омск облазының губернатору Виталий Хоценко-биле Москвага ужурашкан.
Кончуг чугула объектилерниң камгалалынче онза кичээнгейни угландырган. «Чурттакчыларны болгаш объектилерни камгалаары – мурнады көөр угланыышкыннарның бирээзи болуру кол. Хамаатыларның айыыл чок чоруун болгаш бүдүрүлгелерниң турум ажылын магадылаары-биле инфраструктураның бүзүрелдиг быжыын хандырып, бооп болур кандыг-даа айыылды үе шаанда эскерип билири чугула» - деп, Анатолий Серышев демдеглээн.
«Барс 55» территориалдыг бот-камгалал отрядтарын хевирлээри ужуражылганың чугула кезээ болган. Губернатор бүрүн эргелиг төлээге кезекти четчелээр ажылдың амгы чадазын база эки турачыларны деткииринге регионда боттандырып турар хемчеглер дугайында илеткээн. Отрядче кирер хамаатыларга регионда социал деткимче хемчеглери база чогуур төлевирлер көрдүнген – ол ажыл доктаамал чоруп, регионалдыг эрге-чагырганың доктаамал контролюнда турар.
Губернатор оон аңгыда, Омск облазында дүжүт кампаниязының кол сан-чурагайларын таныштырган. Анатолий Серышев регион шынарның бедик стандарттарын база бүдүрүлгениң хемчээлин кадагалавышаан, салдынган сорулгаларны бүзүрелдиг күүседип турарын демдеглеп, чедип алган чедиишкиннерин бедии-биле үнелээн.