Регион Чазааның аппарат хуралында бо чылдың тос айларында республикада кем-херек үүлгедиишкиннериниң байдалын сайгарган.
Корум-чурум камгалакчыларның медээзи-биле алырга, эрткен чылдың ол үезинге деңнээрге бүрүткеттинген кем-херек үүлгедиишкиннериниң ниити саны 8,7 хуу эвээжээн (3494 турганындан 3828). Чартык чылдың түңнели-биле алырга база 8,2 хуу эвээжээни ооң мурнунда демдеглетингенин сагындыраал.
Ылаңгыя аар болгаш онза аар кем-херек үүлгедиишкиннери 17,4 хуу (1186-тан 980 чедир), өлүрүүшкүннер - 28,3 хуу (60-тан 43), кадыкшылга өжегерээн аар кемдээшкин чедирген фактылар - 15,6 хуу (199-тан 168), ооң санында өлүмнүг – 50 хуу (28-тен 14) кызырылган. Наркотиктер-биле холбаалыг кем-херектер 15 хуу (434-тен 369), хөй-ниити черлеринге кем-херек үүлгедиглери - 12,3 хуу (917-тен 804) эвээжээн.
«Эки көргүзүглер көстүп келген, аңаа профилактиктиг хемчеглер улуг рольду ойнаан» — деп, Тываның Баштыңы Владислав Ховалыг Макста бодунуң каналынга дыңнаткан.
А үшкү кварталдың түңнелдеринден алырга, кем-херек үүлгедиишкиннериниң тургузуунда көскү өскерлиишкиннер бар: өлүрүүшкүннер болгаш мага-ботка аар кемдээшкиннер ниитизи эвээжээн-даа болза, оор чорук болгаш ИТ-кем-херек үүлгедиишкиннер саны бедик болуп арткан. Оон аңгыда бажыңга болгаш кудумчуга корум-чурум үрээшкиннериниң үлүү көвүдээн.
Владислав Ховалыг элээн кошкап турар талаже онза кичээнгейни угландырары чугула деп айыткан. Кем-херек үүлгедиишкиннерин оон-даа эвээжедирин чедип алыр херек деп, Баштың идегелин илереткен.
Назы четпээннер-биле профилактиктиг ажылды күштелдирериниң чугулазын база айыткан. Тываның Баштыңы ол угланыышкында кеземче херектерин болдурбас дээш, административтиг айтырыглар талазы-биле прокуратурадан дыңнадыгларга хамаарыштыр дүрген ажылдаар планны кылып, өг-бүлелерниң айтырыгларын улам ханы шинчилеп көөрүн ведомстволарга дааскан. «Бо ажылче хөй-ниити организацияларын база албан хаара тудар херек. Удуртукчулардан санал-оналдарны болгаш тодаргай түңнелдерни манап тур мен» - деп, Владислав Ховалыг Макста бодунуң каналынга демдеглээн.