Тываның Баштыңы Владислав Ховалыг Тыва Республикда ИХЯ-ның күрүнениң автоинспекция эргелелиниң чаа начальниги, полицияның подполковниги Владимир Кичеев-биле бирги ажылчын ужуражылганы эрттирген. Кичеев ооң мурнунда ИХЯ-ның Хакас Республика талазы-биле күрүнениң автоинспекция эргелелин удуртуп турган. Россия Федерациязының иштики херектер сайыды Владимир Колокольцевтиң дужаалы-биле, Тыва Республикада ИХЯ-ның күрүнениң автоинспекция эргелелиниң начальниги кылдыр ол томуйлаткан. Тыва Республиканың иштики херектер сайыды Юрий Завьялов октябрь 2-де ону Тыва Республиканың иштики херектер яамызының хууда составынга таныштырган.
Владимир Кичеев бодунуң албан хүлээлгезинче кирген. Тываның Баштыңы чаа удуртукчу-биле бирги ажылчын ужуражылга үезинде, регионда оруктуң айыыл чок чоруун хандырар мурнады шиитпирлээр айтырыгларны чугаалашкан. Владислав Ховалыг республиканың эрге-чагыргазының орук инфраструктуразын чогуур деңнелге киирер дээш, оруктарны септээр-чаартыр, чырыдылганы, орук демдектерин тургузар дээн ажылдарын таныштырган. Эрткен беш чылда Тывада ниитизи-биле 700 ажыг км регионалдыг оруктарны кылган, 2026 чылдың төнчүзүнге чедир ам-даа 126 км, 2030 чылга чедир 750 хире км септеп чаартыры планнаттынган.
Республикада орук инфраструктуразын хөгжүдери мурнады шиитпирлээр айтырыг бооп хевээр арткан. Регионнуң чурттакчылыг улуг суурларындан аңгыда, эң ыраккы черлерин шынарлыг болгаш айыыл чок оруктар-биле хандырары – кол сорулга.
Ужуражылгага Владислав Ховалыг регион чазааның болгаш Күрүнениң автоинспекциязының мурнады шиитпирлээр ниити айтырыгларын айыткан:
«Тываның оруктарның айыыл чок чоруу – кол айтырыгларның бирээзи. Чаа удуртукчуга орук-озал ондаан база ооң уржуктарын эвээжедир, ол ышкаш чолаачыларның корум-чурумун бедидер сорулганы салдым. Республиканың чазаа ведомствонуң инициативаларын бүгү талазы-биле деткииринге белен. Профессионал болгаш чедимчелиг кады ажылдажылгага идегеп тур мен» - деп, Владислав Ховалыг демдеглээн.
ТР-ниң ИХЯ-ның күрүне автоинспекциязының эргелели организастыг-аналитиктиг ажылдар, орук шимчээшкининиң айыыл чок чоруун суртаалдаар, административтиг хоойлужудулганы күүседир, орук-патруль албаны дээш, 10 угланыышкында ажылды чорудуп турар. Ведомствонуң кол сорулгазы – хөй-ниити корум-чурумун болгаш орук шимчээшкининиң айыыл чок чоруун хандырары. Регионнуң ИХЯ-зының илеткелинден алырга, сөөлгү 9 айның дургузунда Тывада орук шимчээшкининде чогумчалыг байдал демдеглеттинген: орук озал-ондактары, мөчээн болгаш кемдээн кижилер саны эвээжээн, ол ышкаш чаштар болгаш назы четпээннерниң киржилгези-биле айыыл-халаптар саны база кызырылган.