Республикада малчын аалдар чоогунда адыгларның бо-ла көстүп келир апарганы-биле, айыыл чок чорук хемчеглерин күштелдирген. Чазак Даргазының оралакчызының хүлээлгезин күүседип турар Уран-оол Ондарның даалгазы езугаар, аңныыр хайгааралының күрүне комитединден инспекторлар муниципалитеттер чагыргалары-биле кады малчыннарже дыңнадыышкынныг рейдилерни чорудуп турар. Бокту хааглыг саваларже төгерин, херим-кажааны быжыглаарын база мал-маганче араатан амытанның халдаашкынын болдурбас дээш, немелде хемчеглерни алырын айыткан.
Чазак Даргазының оралакчызының айтыышкыны-биле чергелештир, чылдың-на малчыннарның чидиг айтырыы апарган кокайлар санын өйлээр ажылды шапкынчыдып, неделя санында отчеттаарын негээн.
Тываның күрүнениң аңныыр хайгаарал комитеди амгы байдалды хайгааралда тудуп, хүннүң-не рейдилерже үнүп турар. Дүрген хөделиишкинни хандырар дээш, кожуун болгаш суур бүрүзүнде аңныыр инспекторларынга удурткан аңчылар бригадаларын тургускан. Кызылда болгаш ооң чоогунда ындыг ийи бөлүк ажылдап турар. Ведомствонуң дыңнатканы-биле алырга, республикада 3466 адыг бар, бо чылын оларны адарынга 378 чөпшээрелди берген. Ынчалза-даа кижилерниң айыыл чок чоруун хандырар дээш, айыылдыг байдал тургустунуп келзе, чөпшээрел чокка араатан аңны узуткап болур.
Сезон эгелээнден бээр Тываның чурттакчыларындан бажыңнар чоогунда адыглар дугайында 344 медээ кирген, аң хайгааракчылары медээ бүрүзүнче хыналда үнүүшкүннерни чоруткан. Бадыткаттынган таварылгаларда, дириг амытаннарны ырадырын ийикпе, азы кижилерге айыыл тургустунуп келгенде, чок кылырын чөпшээрээн турган.
Бир эвес бажыңнар чоогунга азы суур девискээринге адыг эскерип каар болзуңарза, камгалал албан черлериниң 112 дугаарынче азы Тываның аңныыр хайгааралының күрүне комитединиң 8-923-543-31-33 дугаарлыг изиг шугумунче долгаарын хамаатыларга сагындырып тур. Адыгже чоокшулап азы боду ону үндүр сывыртаары айыылдыг! Үезинде дыңнаткан медээ - специалистерге дүрген хөделиринге дузалаар.