Тываның Баштыңы Владислав Ховалыг база «Россети» ПАН-ның чиңгине директору Андрей Рюмин регионнуң электри четкизиниң ажылынга хамаарышкан ажылчын ужуражылганы эрттирген. Ужуражылганың кол темазы – одалга сезонунда ажыглалы улгады бээр инфраструктураның ажылдаарынга белениниң дугайында болган. Ийи тала дыңзыг сооктар үезинде системаның турум ажылдаарын хандырарынче онза кичээнгейни угландырган.
«Кончуг сооктар үезинде кол хереглел – бажыңнарга үзүктел чок чырык болгаш чылыг Тывага чугула херек. Энергетиктер-биле кады республиканың энергия системазы кандыг-даа улуг чүък таварышса, ол үеде турум ажылдап артсын дээш, бүгү-ле чүүлдерни кылып турар бис» - деп, Владислав Ховалыг МАКС-та бодунуң каналынга дыңнаткан.
Чугаа үезинде хөгжүлдениң стратегтиг төлевилелдерин база чугаалашкан.
«Ооң-биле чергелештир кедизин база бодап турар бис. Чазак Даргазының оралакчызы Александр Новактың бадылааны, Тываның энергетиктиг хөгжүлдезиниң улуг хемчээлдиг төлевилелин федералдыг төп-биле кады боттандырып турар бис. Сорулга – республикага немелде энергетика күчү-күжүн бээри, чаа бүдүрүлгелерниң инфраструктуразын хандырары, электри энергиязының чедишпезин шиитпирлээри, кожа-хелбээ регионнар-биле харылзааларны быжыглаары» - деп, Владислав Ховалыг демдеглээн.
Андрей Рюмин энергетика адырының мурнады көөр айтырыы – эрткен кыштың ажыг сооктарын ашкан арга-дуржулганы барымдаалап, ам келир одалга үезин идегелдиг эрттерин хандырары деп чугаалаан. Ол ышкаш үлетпүр болгаш социал адырлардан чырык энергиязынга хереглел улгатканын айтып, ол чылдагаан-биле «Россети» республиканың четкилерин чаартыр ажылдарны уламчылап турарын ол демдеглээн.
«Россети» бөлүүнүң Тывада инвестиция программазынга планнааан хемчээли 2026 чылда 9 млрд рубль болган. РФ-тиң Чазааның даргазының оралакчызы Александр Новактың бадылааны Энергетика хандырылгазының комплекстиг планындан акша-хөреңгини Тываның энергетика системазының чаа бүдүрүлгелерин кожарынче, ооң бүзүрелдиг ажылын хандырарынче, регионнар аразында энергетика харылзаазын быжыглаарынче угландырар.
Амгы үеде компания Кызылдың хууда секторунда, ооң иштинде солагай болгаш оң талакы дачалар ниитилелдеринде, Вавилин ээтпээнде чырык четкилериниң чаартылгазын чорудуп турар. Оон аңгыда, «Россети Сибирь Тываэнерго» компанияның күштери-биле Кызылда «Иркутский» база «Мөңгүн» чаа чуртталга комплекстерин база Каа-Хем кожуунда социал объектилерни чырык-биле хандырган.
Ужуражылга үезинде чуртталга-коммунал ажыл-агый бүдүрүлгелеринге өрелерни төлээриниң айтырыын база сайгарган. Тываның Баштыңы ужуражылганың төнчүзүнде, амыдыралга чугула айтырыгларны шиитпирлээринге республикага дузалажыр күзелдиг компанияның удуртулгазынга өөрүп четтиргенин илереткен.