Россельхозбанк биле Россияның Көдээ ажыл-агый яамызының кады тургусканы, үре-түңнелдиг агробизнес талазы-биле «Фермер школазы» деп өөредилге төлевилелиниң ээлчеглиг кичээлдери октярбрь 5-те эгелээн. Тываның күрүне университединиң баазазында төлевилелди боттанып турар. Үжен кижи «Огород ажыл-агыйы», «Агротуризм» угланыышкыннарында өөредилгени эгелээн. Оларның аразында тускай шериг операциязының сес хоочуннары база оларның өг-бүле кежигүннери бар.
Тывада «Фермер школазы» 14 дугаар эртип турар. Бо чазын 30 дыңнакчы «Мелиорация», «Мал чеминиң бүдүрүлгези» угланыышкыннарга өөредилгени дооскан. Ниитизи-биле «Фермер школазының» эрткен курстарынга регионндан 2025 көдээ ишчилер тускйа белеткелди эрткен.
«Фермер школазы» Тываның аъш-чем хандырылгазынга болгаш экономиктиг хөгжүлдезинге үлүг-хуузун кииреринге белен көдээ ажыл-агый сайгарлыкчыларының чаа салгалын белеткээринге чугула базым апарган. Школаның доозукчулары көдээ ажыл-агыйга чугула мергежилдерни чедип ап, күрүнеден грант деткимчезин алыр аргазын улгаттырган» - деп, республиканың көдээ ажыл-агый сайыдының бирги оралакчызы Меңги Кара-оол демдеглээн.
Россельхозбанкының Тывада регионалдыг салбырының директору Айдыс Сат банкының Көдээ ажыл-агый яамызы биле ТувКУ-нуң деткимчезин алган банкының өөредилге инициативазын чурттакчы чон үнелээнин демдеглээн: бо чазын төлевилелге сонуургал улуг болганындан, күзүн киржикчилерге чаа чыылданы кылыр деп шиитпирлээн. «Көдээ ажыл-агыйны хөгжүдүп, чаа төлевилелдерни тургузуп, республиканың агроүлетпүр комплекизиниң хөгжүлдезинге үлүг-хуузуну киириштирер шыырак специалистер биске херек» - деп, ол айыткан.
Чуртта улуг төлевилелдиң чаа бөлүүнде 73 регион киржип турар, ында 2130 сургуулдар өөренип турар. Тускай шериг операциязының 550 ажыг хоочуннарын болгаш оларның өг-бүлелерин бирги ээлчегде хүлээп алган.
«Фермер школазы» — көдээ ажыл-агыйның кол дээди өөредилге черлеринге теоретиктиг билиглерни болгаш чедиишкинниг бүдүрүлгелерге практикалар база бодунуң бизнес-планнарын тургузары кирген долу курс-тур. Программа 2,5 ай үргүлчүлээр болгаш, 150 шак теория болгаш 100 шак практика кичээлдерлиг.
Киржикчилер аразында ажыл-агыйының үре-түңнелин бедидер сорулгалыг амгы үениң фермерлери база бизнести чаа-ла эгелээр күзелдиг кижилер бар. Программа тус черниң күш-ажыл рыногунуң хереглелдерин көрүп, ылаңгыя көдээ ажыл-агый адырынга специалистер хереглеттинип турар Тыва Республикага чугула херек. Студентилер өөредилгезин доооскаш, күрүне дипломун алырлар.