Тыва Республикада чонга дыңнадыг системаларының беленинге комплекстиг хыналданы октябрь 7-ден 9-че чылдырган. Регионнуң хамааты камгалал болгаш онза байдалдар албаны ооң дугайында дыңнаткан.
Пятницада, октябрьның 9-та, 10 шак 40 минута турда, «Шуптуңарның кичээнгейиңерге!» деп сиренаны дамчыдар. Телевидение каналдарынга база ол-ла үе шакта дыңнадыгны дамчыдар.
Сирена сигналы хамааты камгалалдың айыыл-халап дугайында сагындырыы болурун албан чери тайылбырлаан. Тываның киржип турары Бүгү-россияның хамааты камгалал өөредилгезиниң үезинде дыңнадыг системаларының техниктиг хыналдазы чылдың-на эртип турар болгаш, чурттакчы чонну дүвүревейн, оожургап алырын сагындырган. Бо удаада өөредилгени октябрьның 7-9 хүннеринде планнаан.
Өөредилге ийи чадага эртер. Ооң сорулгазы – чурттакчы чоннуң онза байдалдарда хөделириниң белеткелин көрүп, түр када чурттаар төптерни четчелээнин база оларның байдалын хынап, шупту специалистерниң демниг ажылын мөөөңнээрин чедип алыры.
Өөредилгелер үезинде, Россияның онза байдалдар албанының территориалдыг иштики системазының, аварийлиг-камгалал албаннарының база хамааты камгалалдың штаттан дашкаар бөлүктериниң күштерин болгаш арга-шинээн хынаар. Ол ышкаш хамааты камгалал организацияларының ажылдакчылары хоорай объектилеринден өскээр көжүреринге, подвалдарже болгаш өске-даа чер адаанда черлерге чаштынарынга практиктиг хемчеглерни шиңгээдир. Оон аңгыда ракета, авиация азы ужудукчу чок ужар чүүл халдаашкынының дугайында медээни алганда, чүнү канчаарын катаптаарлар.