«Сонуургалдарны ажыдып тура» ачы-буян фондузу «Тываның кадет корпузу» республиканың школа-интернадынга «Сээң траекторияң» деп профугланыышкынныг төлевилелди боттандырып эгелээн. Өөредилге чериниң администрациязы-биле када шилээни 15 өөреникчи халас өөредилге программазынга киржир.
Төлевилел аныяк өскенниң келир үеде мергежилин шын шилип, карьеразын тургузарынга практиктиг арга-дуржулганы хевирлээринче угланган. Киржикчилер эге чадазында чугаа чорударын, эмоционалдыг угаан-медерелди, шүгүмчүлелдиг боданыышкынны болгаш команда-биле ажылдаар аргаларны хөгжүдеринче профессионал бот-башкартынылга анкетазын долдуруп, « XXI чүс чылдың мергежилгелери» квест оюнну эрткен.
Тываның кадет корпузунуң директору Алдынай Даржай программада интерактивтиг кичээлдер, экскурсиялар, тренингилер, аңгы-аңгы мергежилдер төлээлери-биле ужуражылгалар киргенин тайылбырлаан.
Оон аңгыда программа аныяк өскенни дүвүрээзинни ажып эртерин, бодунуң күш-шыдалын билип алырын болгаш сагыш-сеткилин канчаар башкарарын, үезин чөптүг планнаарын, акша-хөреңгини шын ажыглаарын, өг-бүледе чөрүлдээлерни канчаар шиитпирлээрин өөредир. Оолдар төлевилел ажыл-чорудулгазын шиңгээдип, чугула шиитпирлер хүлээп алырындан база частырыглар кылырындан кортпас кылдыр боттарын өөредир.
Келир үениң профессионалдары апаар школачылар баштайгы резюмезин тургузуп, боттарын таныштырып, чугаалажылгаларны эртер. Оон аңгыда янзы-бүрү мергежилдиг төлээлер-биле ужуражып, бүдүрүлгелерге экскурсиялап, практиктиг арга-дуржулганы алырлар.
Аныяк өскенниң бо мергежилдерин сайзырадырынга оюн хевирлиг кичээлдер келир үезинге стратегтиг чугула. Оюннар оларның келир үезинге стратегтиг ужур-дузалыг болганда, элээдилерниң ук билиглерин сайзыраңгайжыдар апаар. Амгы үениң специалистеринге хамаарыштыр дүрген өскерлип турар негелделеринде дүүштүр шын боданыр, чедимчелиг чугаалажып билир, сагыш-сеткилди дээштиг угландырар болгаш команда-биле ажылдап шыдаары — «чымчак мергежилдер» деп адаар эртем билиглеринге дыка херек апарган. Ындыг мергежилгелер аныяктарга чүгле мергежил шилип алырынга эвес, а херек билиглер-биле чепсеглеп, карьера оруун тургусчуп, кандыг-даа профессионал хүрээлелге чедиишкинниг киржир арганы бээр. Бо чүүл аныяк специалистерниң келир үеде бот-сайзыралынга болгаш экономиктиг хамаарышпас чоруунга үндезиннерни тургузар.
«Азия төвүнүң келир үези» социал-инновациялыг, патриотчу төлевилелдерни деткиир болгаш боттандырар коммерцияга хамаарышпас автономнуг организацияның регионалдыг куратору база даргазы Сергей Лопсан, Тыва Республикада Уругнуң эргелериниң талазы-биле бүрүн эргелиг төлээниң ажыл-чорудулгазын хандырар эргелелдиң начальниги Сай-Суу Седии база Тыва Республиканың Өөредилге яамызының төлээлери Тывага төлевилел ажыдыышкынынга хүндүлүг аалчылар бооп киришкеннер.
«Сонуургалдарны ажыдып тура» ачы-буян фондузу элээдилерге болгаш аныяктарга, ооң иштинде ада-иезиниң хайгааралы чок болгаш амыдыралдың берге байдалынга таварышкан уругларга дузалап турар. Фонд бүгү Россиядан 8 муң ажыг школачыларны болгаш 5 муң волонтерларны каттыштырып, мөөрейлер, ачы-дуза төлевилелдери болгаш янзы-бүрү өөредилге программалары таварыштыр оларның социал адаптациязын болгаш профессионал бот-тускайлаңын деткип турар. Бо чылдың сентябрьда фонд биле «Азия төвүнүң келир үези» автономнуг коммерцияга хамаарышпас организацияның даргазы Сергей Лопсан аразында кады өөредилгени эртип, ажылдажылга дугуржулгазынга атты салганының түңнелинде, «Сээң траекторияң» төлевилелди Тывага боттандырары чедип алдынган.