Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Сибирьниң казактар шерииниң атаманы база Россияның Маадыры Андрей Тимошенко-биле ажылчын ужуражылганы эрттирген.
Сибирьниң казактар шерии Россия Федерациязының тос тургузукчу субъектизиниң девискээрлеринде, оларның алдызы Сибирь федералдыг округта (Алтай Республика, Алтай край, Кемерово, Новосибирск, Омск, Томск областар), үжү Урал федералдыг округта (Тюмень область, Ханты-Манты автономнуг округ, Ямал-Ненец автономнуг округ) бактааттынган.
2021-2030 чылдарда Россия Федерациязының күрүне политиказының стратегиязын боттандырганының түңнелдерин чугаалажып көрген. Ону боттандырарынга Россия Федерациязының Сибирь федералдыг округунуң тургузукчу субъектилериниң казактар ниитилелдери, күрүне эрге-чагырга болгаш тус чер бот-башкарылга органнары киржип турар. Андрей Тимошенко 2027 чылда салдынган сорулгаларны бүрүн эргелиг төлээге таныштырган.
Элээн каш угланыышкыннарда ажылдың түңнелдери хүн чурумунуң кол темазы болган: тускай шериг операциязынга казактарның киржилгези, гуманитарлыг дуза чыылдазы болгаш чорудары, көжүп чоруур өртчү бөлүктерже эки турачыларны хаара тудары. Оон аңгыда, чаа эгеки казактар ниитилелдерин тургузары база оларны Россия Федерациязының казактар ниитилелдериниң күрүне реестринче киирериниң чурумун чугаалашкан.
Аныяктарның патриотчу кижизидилгезинче угланган ажыл-чорудулганы, ооң иштинде шериг наызын чеде берген аныяктарга «Казак зарница» шериг-спортчу оюннуң регионалдыг чадаларын, «Күш-ажылга болгаш камгалалга белен» маргылдааларны, ол ышкаш «Братина» деп регионнар аразының казак культура фестивалын аңгы демдеглээн.
Андрей Тимошенко бүгү талазы-биле деткимчези дээш бүрүн эргелиг төлээге четтиргенин илереткеш, чурттуң камгалакчы арга-шинээн болгаш хөй-ниитиниң айыыл чок чоруун быжыглаары орус казактарның мурнады боттандырар айтырыы болуп артканын демдеглээн. Амгы үеде Сибирьниң казак шериг ниитилелиниң кежигүннериниң ниити саны 6,6 муң кижи, оларның 4,3 муңу күрүне болгаш өске-даа албаннарда хүлээлгезин күүседип турар. 1,5 муң казактар – ТШО дайынчыларының одуруунда.
Анатолий Серышев тускай шериг операциязының үезинде казактарның көргүскен ак сеткилдиг албанын, эрес-дидим болгаш маадырлыг чоруун бедии-биле үнелээн. Сибирь федералдыг округ Стратегияда көрдүнген сорулгаларны чедип алырынче угланган комплекстиг хемчеглерни чедиишкинниг боттандырып турарын база демдеглээн. Бүрүн эргелиг төлээ казактар ниитилелин быжыглаарынга, оларның сүлде-сүзүүн база культуразын кадагалап, сайзырадырынга, национал айыыл чок чоруктуң сонуургалдарынга күрүне айтырыгларын шиитпирлээринче оларны калбаа-биле хаара тудар ажылдарны уламчылаарынче кыйгырган.