Октябрь 1-де Бүгү-делегейниң улуг назылыглар хүнүн демдеглеп эрттирип турар. Бо байырлал хүнүн он-он чурттарда, ооң иштинде Россияда албан езузу-биле демдеглээри чаңчыл апарган. Чаңчыл ёзугаар бо хүн улуг назылыг кижилерни хүндүлээр. Чогуур ведомстволар кирген республиканың оргкомитеди байырлалга тураскааткан хемчеглерниң улуг программазын белеткээн. Муниципалдыг тургузуг бүрүзү улуг назылыг хамаатыларны хүндүлеп, оларга ачы-дуза чедирер бодунуң планын белеткээн.
Октябрьның баштайгы он хонуунда хоочуннарга концерттерни, солун ужуражылгаларны, спортчу маргылдааларны организастаар, ооң-биле чергелештир эмчи консультациялары болгаш волонтерларның ачы-дуза чедириишкини уламчылаар. Социал албан черлери бот чурттап турар пенсионерлерниң амыдырал байдалын шинчилеп, волонтер организацияларның, студентилерниң, школачыларның деткимчези-биле бажың ажылдарынга дузазын көргүзер.
Программа информастыг, организастыг, эмчи, социал, культурлуг болгаш спортчу кол хемчеглерден тургустунган.
Организастыг хемчеглер:
Сентябрь 23-28-те – социал туризм: Даг-Алтай хоорайже аян-чорук. Чаа солун чүүлдерни көрүп, үе чергези-биле таныжып алыр кылдыр стационарлыг социал хандырылга организацияларының чурттакчылары аян-чорукче аъттаныр.
Октябрь 1-де – аңгы-аңгы адырларның албан черлеринге, организацияларга база бүдүрүлгелерге ажылдап чораан хоочуннарга байыр чедириишкини.
Октябрь 1-де, 16.00 – аңгы-аңгы регионнарда чурттап чоруур IV делегей чергелиг буддийжи форумнуң 60+ волонтерлары-биле теле-көвүрүг. Кызылдың Аныяктар ордузу.
Культура-массалыг хемчеглер:
Сентябрь 29-та, 10:00 — Кызылдың бажың-интернадынга «Амыдыралдың күзү — алдын үе» деп литературлуг-хөгжүм гостинаязы.
Октябрь 1-де, 11.00 – Кызылдың бажың-интернадының хоочуннар болгаш инвалидтеринге аныяк талантыларның концерти.
Октябрь 1-де, 12:00 – В. М. Халилов аттыг Тываның күрүне филормониязынга «Мээң харым – мээң байлаам» байырлал концерти.
Октябрь 1-де, 14:00 – А. С. Пушкин аттыг Национал библиотекага күрүне ажылдакчызы, узун назылыг хоочун Г. Ч. Ширшин-биле «Узун назынның чажыды» деп ужуражылга.
Эмчи-социал хемчеглер:
Бүдүн октябрьда тускай специалистерниң үнүүшкүннүг бригадалары узун назылыг кижилерни чурттап турар чериниң аайы-биле хүлээр.
Октябрь 3-7-де — төпчүткен кожуун эмнелгелеринге база Улуг-Хем, Чөөн-Хемчик база Барыын-Хемчик кожууннарның муниципалдар аразының эмнелге төптеринге, №1 республика эмнелгезинге, Республиканың консультативтиг-диагностика төвүнге улуг назылыг кижилерге консультативтиг хүлээп алыышкын.
Сентябрьның 29-тан октябрь 3-ке чедир – ТВ, радио база соцчеткилерге «Идепкейлиг узун назын», «Назылаанындан астенияга профилактика», «Альцгеймер аарыы» деп темаларга эксперттерниң тайылбыры.
Октябрьның 1-ден 10 хүннеринде – чурттакчы чонга социал хандырылганың стационар организацияларынга ажык эжиктер хүннери.
Ачы-буянныг ажыл-херектер болгаш акциялар:
Бүдүн октябрьда – «Сагыш човаашкын» база «Өгбелерге дузавысты көргүзээли» акция: чааскаан чурттап турар хоочуннарның амыдырал байдалын хынаары, хоочуннарның чурттап турар чериниң аайы-биле тимуржу дуза.
Октябрь 1-10 хүннеринде – кышка белеткел: тускай яамылар специалистериниң, хөй-ниити организацияларының база волонтерларның киржилгези-биле дүжүт чыылдазы, соңга, хаалга чылыглаашкыны, ногаалар дузап, белеткээри.
Октябрь 1-5 хүннеринде – студентилерниң шефтээшкини: хоочуннарның бажыңының ишти-даштын арыглап аштаары.
Спорт база шимчээшкин:
Октябрь 2-де – стационарлыг социал хандырылга организацияларынга скандинав кылашка марафон.
Октябрь1-де, 10:00 — Советтиг Тываның 5 чылы аттыг стадионга 50 хардан өрү назылыгларга ГТО нормазын дужаар байырлал.
Октябрь 2-де, 14:00 — Советтиг Тываның 5 чылы аттыг стадионга ушу саньдага мастер-класс болгаш үлегерлиг көргүзүг.
Октябрь 4-те, 10:00 — И. Ярыгин аттыг спорт комплекизинге хоочуннар аразынга шыдыраа маргылдаазы.
Дыштанылга болгаш харылзажылга:
Октябрь 3-те, 15:00 – Культура болгаш дыштанылганың национал парыгынга «Күскү сесерликке» деп дыштанылга хүнү.
Октябрь 1-10 хүннеринде – муниципалитеттерге байырлал концерттери, шайлаашкыннар база «хөглүг старттар».
Октябрь 1-3-де – Россияның Социал фондузунуң Тыва Республикада салбырынга улуг назылыг кижилерниң ужуражылга төвүнге хемчеглер.