Россия Федерациязының Федералдыг Хуралының Федерация Чөвүлелиниң Даргазы Валентина Матвиенкодан байыр чедириишкинниг телеграмма келген.
«Тыва Республиканың айтырыгларын ханы билир, регионнуң турум хөгжүлдезинге, инвестицияларны хаара тударынга, амыдырал-чуртталганың шынарын бедидер дээш дыка хөйнү берген арга-дуржулгалыг болгаш ажыл-агыйжы удуртукчу кылдыр силер бодуңарны бадыткадыңар. Силерниң бо харыысалгалыг күрүне албан-дужаалында күш-ажылыңар моон-даа соңгаар чедиишкинниг болгаш үре-түңнелдиг болурунга бүзүрээр мен» - деп, ында бижээн.
Россия Федерациязының Чазааның Даргазы Михаил Мишустин байыр чедириишкинниг телеграммада республиканың база катап соңгуттурган Баштыңынга бодунуң планнарын боттандырарынга чедиишкиннерни күзээн: «Регионнуң хөгжүлдезинге болгаш чоннуң амыдыралын экижидеринге сеткилиңерден тура-сорууңар чурттакчыларның деткимчезин чаалап ап, сентябрьның соңгулдаларынга тиилелгени чедип алырынга дузалаан. Регионнуң социал-экономиктиг күчү-күжүн моон-даа соңгаар быжыглаарыңарга бүзүрээр мен. Тываның моон-даа соңгаар чечектелиишкинин чедип алыр дээш, бүгү-ле чүүлдерни кылыптар силер».
Россия Федерациязының Агаар-космиктиг күштериниң кол командылакчызы Александр Чайко бодунуң болгаш Россияның аэрокосмиктиг күштериниң хууда составының өмүнээзинден Владислав Ховалыгга байыр чедириишкинин база чоруткан. Соңгулдаларга амгы Баштыңның ылап тиилелгезин ооң политиказынга болгаш келир үеде турум чорукка чоннуң бедик бүзүрелиниң көскү бадыткалы болган деп айыткан. «Силерниң ажыл-чорудулгаңар регионнуң моон-даа соңгаар социал-экономиктиг хөгжүлдезинге, ооң чурттакчыларының чаагай чоруун бедидеринге ужур-дузалыг программаларны чедиишкинниг күүседиринге идиг бээр дээрзинге бүзүреп тур мен» - деп, Россияның аэрокосмиктиг күштериниң кол командылакчызы байыр чедириишкининде айыткан.
Россия Федерациязының Чазааның Даргазының оралакчызы Марат Хуснуллин Тываның Баштыңын деткип, ажыл-ижинге чедиишкиннерни күзээн: «Чаңгыс чер чурттугларыңарның болгаш чаңгыс үзел-бодалдыг командаңарның деткимчези-биле регионнуң кол хөгжүлде айтырыгларын шиитпирлеп, ооң социал-экономиктиг арга-шинээн быжыглаарын уламчылаар силер дээрзинге бүзүрээр мен».
Россия Федерациязының кадык камгалал сайыды Михаил Мурашко Владислав Ховалыгга регионну хөгжүдеринге, национал төлевилелдерниң чедиишкинниг боттандырарынга, чурттакчы чонну кадагалап арттырарынга, кижилерниң кадыкшылын быжыглаарынга, чаагай чоруун бедидер национал сорулгаларны чедип алырынга үре-түңнелдиг ажылдаарын күзээн.
Москваның мэри Сергей Собянин база-ла Тываның Баштыңынга инаугурациязы-биле телеграмма дамчыштыр байыр чедирип, ооң албан-дужаалынче киргени регионнуң чурттакчыларының чаагай чоруу дээш боттуг ажыл-херектер болгаш көскү чедиишкиннер-биле манап турарын демдеглээн.
ВТБ банкының (ПАН) президентизи – баштаар чериниң даргазы Андрей Костин катап база соңгуттурган Тываның Баштыңынга республиканың чурттакчыларының чаагай чоруу дээш планнаан бүгү-ле ажыл-херектери күүсеттинерин күзээн.
Россияның өске-даа федералдыг удуртукчулары болгаш регионнар губернаторларындан база байыр чедириишкиннери келген.