Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Тываның Баштыңында катап база соңгуттурган Владислав Ховалыгга дүжүлгеже киргени-биле байырны чедирген. Байырлыг езулал регионнуң төвү Кызылга болуп эрткен.
Сөөлгү беш чылда регион баштыңының ажыл-херээн бедии-биле үнелээнин база ооң чоокку үеде ажыл-чорудулга планынга бүзүрелин болгаш деткимчезин республика соңгулдаларында тиилелгези көргүзүп турар деп, Серышев демдеглээн.
«Сөөлгү чылдарда ниитилелди быжыглап, мурнады хөгжүдер угланыышкыннарже күжениишкиннерни мөөңнээниниң ачызында, республика экономиктиг болгаш социал хөгжүлдеде болгаш чаагай чорукту экижидеринде улуг чедиишкиннерни чедип алган» - деп, Президентиниң бүрүн эргелиг элчини онзалап демдеглээш, республика баштыңы болгаш ооң командазы чурттакчылар-биле доктаамал чугаалажып, оларның санал-оналдарын кичээнгейге ап, тургузукчу күш-ажылче хаара тудуушкунну кады уламчылаарынга бүзүрелин илереткен.
Анатолий Серышев Тываның экономиказы федералдыг төптүң доктаамал деткимчези-биле хөгжүп турарынче кичээнгейни углап, ол темпини хевээр арттырып, үре-түңнелдерже угланырын айыткан. Ол регионну хөгжүдеринге болгаш амыдыралдың шынарын бедидеринге республиканың арга-шинээн чедимчелиг болгаш долузу-биле ажыдарының чугулазынга хамаарыштыр Россия Федерациязының Президентизи Владимир Путинниң туружун чугаалаан.
Тыва Республиканың бот-тускайлаң социал-экономиктиг хөгжүлде программазын боттандырарынга Россия Федерациязының Чазаа болгаш федералдыг ведомстволар-биле сырый кады ажылдажылгазын уламчылаары мурнады боттандырар айтырыглар санында деп бүрүн эргелиг төлээ демдеглээн. Ында улуг инвестиция төлевилелдеринге, биче болгаш ортумак сайгарлыкчы чорук хөгжүлдезинге, херек инфраструктураны тургузарынга таарымчалыг байдалдарны тургузарының, көдээ ажыл-агый болгаш туризм дээн ышкаш перспективтиг адырларның хөгжүлдезинге чаа идигни бээриниң дугайында чугаа мында чоруп турар.
Анатолий Серышев национал төлевилелдер боттандырылгазынга республиканың киржилгезиниң айтырыын база аңгы демдеглээн. Регионга социал объектилерни, бирги ээлчегде школалар болгаш школа назыны четпээннер албан черлерин эде чаартылгазы болгаш тудуунче немей кичээнгейни угландырары чугула.
Республика Баштыңы тускай шериг операциязының киржикчилерин болгаш оларның өг-бүлелерин комплекстиг деткиири ажылдың онза ужур-уткалыг угланыышкыны кылдыр тодараткан. Хоочуннарны тайбың амыдыралче хаара тударының, ажыл тып алырынга азы хууда бизнести ажыдарынга байдалдарны тургузарының чугулазын бүрүн эргелиг төлээ демдеглээн. Тускай шериг операциязының хоочуннары, ооң иштинде федералдыг «Маадырлар үези» программага дөмейлешкек «Тываның маадырлары» регионалдыг кадрлар программазының доозукчулары, республиканың удуртулга командазын быжыглап, аныяктарга төлептиг үлегер-чижекти көргүзүп, регионнуң хөгжүлдезинге болгаш чурттуң национал хөгжүлде сорулгаларын чедип алырынга үлүг-хуузун киирер деп, ол санаан.
«Мурнувуста республиканың бурунгаар хөгжүлдезинче, ол ышкаш ниитилел-политиктиг турум чорукту хандырарынче, националдар аразында эп-найыралды быжыглаарынче, российжи үндезин сүлде-сүзүк болгаш мөзү-шынар үнелиг чүүлдерин кадагалап арттырарынче угланган чугула болгаш харыысалгалыг ажылдар манап турар» - деп, Анатолий Серышев түңнээн.
Ук хемчегге Тыва Республиканың Дээди Хуралының (парламент) депутаттары, регионалдыг күүсекчи эрге-чагырга органнарының, тус чер бот-башкарылга органнарының удуртукчулары, регионнуң хөй-ниити төлээлери киришкен.