Бөгүн В.Көк-оол аттыг Национал театрга Тыва Республиканың Баштыңының албан-дужаалынга Владислав Ховалыгның албан езузу-биле киргениниң байырлыг езулалы болуп эрткен. Ёзулалдың дүрүмү езугаар регионнуң чаа соңгуттурган удуртукчузу орус, тыва дылдарда даңгыраан берип, дараазында беш чылда бодунуң ажыл-ижиниң кол угланыышкыннарын айыткан.
Байырлыг езулал Россия Федерациязының болгаш Тыва Республиканың күрүне туктарын, ол ышкаш Тываның Баштыңының эрге-чагыргазының ыдык демдектери — хөрек демдээ биле таңмазын киирип эккелгени-биле эгелээн.
Тыва Республиканың Төп соңгулда комиссиязының даргазы Адыгжы Донгак сентябрь 18-тен 20-ге чедир чаңгыс аай бадылаашкын хүнүнде эрткен Тыва Республиканың Баштыңының соңгулдаларының түңнелдерин дыңнаткан. Бадылаашкынга 170 муң ажыг соңгукчулар киришкен. Республиканың дээди албан-дужаалынче беш кандидат кордап киришкен. «Чаңгыс демниг Россия» партияның идип үндүргени республиканың амгы Баштыңы Владислав Товарищтайович Ховалыг эң хөй үннү алган. Ол дээш 159 муң ажыг соңгукчу үнүн берген, ол дээрге 90 хуузу-дур.
Соңгулда комиссиязының даргазы Владислав Ховалыгга албан-дужаалче соңгуттурганы-биле байыр чедирип, салдынган сорулгаларын чедиишкинниг күүседирин база бедик чедиишкиннерни күзээн.
Ооң соонда Тываның Баштыңының албан-дужаалынче саадаарының езулалы эгелээн, ону Тыва Республиканың Дээди Хуралының (парламент) даргазы Каң-оол Даваа ажыткан. Тыва Республиканың Конституциязының 110 чүүлүнүң 4-кү кезээнге дүүштүр ол Владислав Ховалыгны даңгырак бээринче чалаан.
Владислав Ховалыг оң холун Тыва Республиканың Үндезин Хоойлузунга салгаш, хоойлу-биле бадылаан даңгырактың сөзүглелин орус болгаш тыва дылдарда номчаан:
«Тыва Республиканыӊ хөй националдыг чонунга шынчы бараан болурун, кижиниӊ болгаш хамаатыныӊ эргелерин база хостуг эргелерин хүндүлээрин, камгалаарын, Россия Федерациязыныӊ Конституциязын болгаш Тыва Республиканыӊ Конституциязын, федералдыг хоойлуларны, Тыва Республиканыӊ хоойлуларын сагыырын, Тыва Республиканыӊ Баштыӊыныӊ бедик хүлээлгелерин ак сеткилдии-биле күүседирин ыдыктыы-биле даӊгыраглап тур мен».
Езулал соонда, Тыва Республиканың Баштыңының эрге-чагыргазының ыдык демдектери — хөрек демдээн болгаш таңмазын хүлээп алган. Республиканың дээди албан-дужаалдыг кижиниң албан-дужаалче киргениниң байырлыг даңгыраан бергениниң соонда, бүрүн эргелерин күүседир хуусаада Тыва Республиканың Баштыңының ыдык демдектерин аңаа тыпсыр. Ол ыдык демдектер байырлыг ёзулалдар болгаш албан-езузунуң хемчеглер үезинде онзагай ылгавыр демдектер кылдыр ажыглаттынар.
РФ-тиң Президентиниң Сибирь федералдыг округта бүрүн эргелиг төлээзи Анатолий Серышев республика Баштыңының албан-дужаалынче киргени-биле Владислав Ховалыгга байыр чедирген. Тываның чурттакчылары сөөлгү беш чылдарда регион удуртукчузунуң ажыл-чорудулгазын бедик үнелеп, аңаа бүзүреп, чоокку чылдарда ооң ажыл программазын деткээнин соңгулданың түңнелдери тодаргай көргүскен деп бүрүн эргелиг төлээ демдеглээн. Чон-биле чугаалажып, оларның күзел-соруун болгаш тодаргай санал-оналдарын барымдаалап, чоннуң эгелээшкини-биле тургускан программаның чугулазын Серышев демдеглээн.
Анатолий Серышев республиканың катап соңгуттурган Баштыңы болгаш ооң командазы, ооң иштинде муниципалдыг деңнелде, республиканың чурттакчылары-биле доктаамал харылзаалыг ажылдаар дээрзинге бүзүрелин илереткен.
Бүрүн эргелиг төлээ чурттуң Президентизи Владимир Путин чаңгыс эвес удаа онзалап айытканы республиканың бедик күчү-шыдалын база демдеглээн:
«Республика, шынап-ла, улуг, хөй планныг арга-шинектиг. Күрүне Баштыңының демдеглээни дег, «ол арга-шинекти чедимчелиг ажыдып, регионну хөгжүдеринге болгаш кижилерниң амыдыралының шынарын бедидеринге бар аргаларны ажыглаары чугула».
«Тыва Республиканың бот-тускай социал-экономиктиг хөгжүлде программазын боттандырарынга Россияның Чазаа болгаш федералдыг ведомстволар-биле эң-не сырый кады ажылдажылганы уламчылаары чугула» - деп, Анатолий Серышев чугаалаан.
Бүрүн эргелиг төлээ чурттуң удуртулгазының салган бүгү сорулгаларын күүседиринге чедиишкиннерни база күрүне Баштыңының болгаш республиканың чурттакчыларының аңаа бүзүрелин бүрүнү-биле шынзыдарын Владислав Ховалыгга күзээн.