В.Көк-оол аттыг Национал театр 91 дугаар театр сезонун «Алдын маска» национал шаңналынга төлептиг болган «Сырын хаттың тоожузу» деп мюзиклдиң көргүзүү-биле ажыткан. Тыва Республиканың Чазааның Т. Д. Дулуш аттыг үрер хөгжүм оркестри, В. М. Халилов аттыг Тыва күрүне филармониязы, Тыва национал оркестри, «Саяннар» хөгжүм болгаш танцы театры база чогаадыкчы сезонун бо неделяда ажыдар. Республиканың Баштыңы Владислав Ховалыгның чарлааны Чогаадыкчы күш-ажылдың болгаш өг-бүле ыдыктарының чылынга тураскааткан шиилер болгаш концертер репертуары чаа сезонну ажыдар. Шупту оюн-көргүзүглерже билеттерни Пушкин картазы-биле садып ап болур.
В.Көк-оол аттыг Национал театрның 91-ги театр сезонунуң ажыдыышкыны үш хонук үргүлчүлээр болгаш чаңчылчаан сүлде-сүзүк үнелиг чүүлдери-биле сырый харылзаалыг сюжеттиг үш көргүзүглерни бараалгадыр. «Сырын хаттың тоожузу» деп мюзикл көрүкчүлерни тыва тоолчургу делегейже апаар. Сентябрь 26-да «Чүглеңген күзел» деп шии — чүректерге дээй бээр аңгы төөгү. Хөй ажы-төлдүг өг-бүледен оол ада-иезин чидирген соонда, дораан-на өскүстер бажыңынга кирип келгенинден төөгү эгелээр. Сентябрь 27-де «Амыдырал» деп шии кымны-даа тоомча чок арттырбас.
«Сезонну биске чоок төөгүлер-биле ажыдып турар бис. Кежээлерни кады эрттирип, каттыржып, муңгарап, театр канчаар каттыштырыптарын эскерип көрээлиңер» - деп, чаа театр сезонунуң ажыдыышкынының дугайында дыңнадыгында бижээн. Билеттерни театрның кассазындан азы сайтызындан садып ап болур: theatre-tuva.ru/afisha/
Тыва Республиканың Чазааның Т.Д.Дүлүш аттыг үрер хөгжүм оркестриниң 19 дугаар концерт сезону сентябрь 29-та ажыттынар. Красноярск крайның алдарлыг артизи Александр Белопашинцев кежээниң тускай аалчызы болур. Дирижерлар Алексей Мөңге биле Найыс Дулуштуң удуртагазы-биле ТР-ниң Улустуң артизи Софья Кара-оол, билдингир күүседикчилер Владимир Симчит, Чооду Ачын, Начын Чөреве, Алдынай Араптан, Түмен Шыырап, Марк Ондар, Сүлде Иргит, Адыя Кан-оол, Менги Маады , Отчугаш Сендажы концертке киржир. Концерт В.Көк-оол аттыг Национал театрга 19:00 шакта эгелээр.
Октябрь 1-де «Саяннар» театры симфониктиг хөгжүмге болгаш танцыга ынактарны чалап турар. Чогаадыкчы сезоннуң ажыдыышкын кежээзи өг-бүле болгаш уран чүүл дээн ышкаш мөңгеде үнелиг чүүлдерге тураскааттынган. Программада кижи бүрүзүнүң чүрээнге дээптер ынак номерлер, чаа оюн-көргүзүглер, сеткилди өөртүптер хөгжүмнүг төөгүлер кирген. Билеттерни quicktickets.ru/kyzyl-teat... онлайн-касса таварыштыр садып ап болур.
Тодаргай медээни бо телефондан алыр: +7 (394 22) 2 11 41.
Октябрь 2-де Тыва национал оркестр 24 дугаар концерт сезонун ажыдар. Ол хүн көрүкчүлерни хову аялгаларының күштүг энергиязы, үр үеде манаан премьералары болгаш алдын фондуда ынак чогаалдарының кайгамчык көргүзүү уткуур деп, оркестрниң удуртулгазы аазаан. Күүседикчилерниң аразында Шыңгыраа, Маны-саа студиязы, Станислав Ириль, Тайгана Мочек, Мерген Куулар база бар. Билеттерни интернет таварыштыр садып ап болур: quicktickets.ru/kyzyl-naci...
В.М. Халилов аттыг Тываның күрүне филармониязы 58 дугаар концерт сезону октябрь 7-де ажыдар. Виктор Токаның симфониктиг оркестри, филармонияның ыраажылары, «Аян» бөлүү ойнаар. Классиктиг болгаш амгы үениң чогаалдары, орус болгаш делегей чергелиг хөгжүм, улустуң аялгаларының аранжировкалары, тыва композиторларның бот-тускайлаң чогаалдары хөйнүң кичээнгейин хаара тудар.
Филармония ылаңгыя школачыларны, студентилерни болгаш аныяктарны база өөртүр: «Улусчу хөгжүм биле академиктиг уран чүүлдүң аразында харылзаазын келгеш, дыңнап көрүңер даан. Ол чарша чүүлдү чүгле боду дыңнаар херек» - деп, филармония медеглээн. Оон аңгыда, концертче билеттерни Пушкин картазы-биле садып алыр арга бар. Билеттерни филармонияның кассазындан база онлайн садып ап болур: quicktickets.ru/tour/final...
Айтырыглар бар болза, дараазында телефонче долгаар: 2-15-20.