Республиканың Баштыңы Владислав Ховалыг Москвага ажылчын сургакчылаашкын үезинде РФ-тиң Күш-ажыл болгаш социал камгалал сайыдының оралакчызы Магомед Абдулхалимов-биле ужурашкан. Регионда тускай программаларның күүселдезин, тускай шериг операция киржикчилеринге болгаш оларның өг-бүлелеринге бүгү талалыг деткимчени көргүзериниң, Дерзиг-Аксы суурда хоочуннар бажыңының тудуунуң дугайында тодаргай чугаалажып сайгарган.
Владислав Ховалыг чугаа үезинде, камгалакчылар болгаш оларның өг-бүлелери дээш сагыш човаашкын регион эрге-чагыргазының мурнады шиитпирлээр айтырыы дээрзин демдеглээн. Республикада тускай шериг операциязының киржикчилеринге болгаш оларның өг-бүлелеринге ачы-дуза чедирер талазы-биле элээн каш хемчеглер боттанып турар.
Ындыг хемчеглерниң бирээзи, 2026 чылда киирген, тускай шериг операцизында (ТШО) алган балыгларындан инвалид апарганы дээш чаңгыс катап төлээр материалдыг дузаны кииргени болур. Чыл эгезинден бээр ол төлевирни 378 кижи алган. Ол төлевирлерже республика бюджединден 16 млн. ажыг рубльди тускайлаан. Бо чылын киирген база бир хемчег – тускай шериг операциязындан халашкан киржикчилерге болгаш хоочуннарга Тываның санаторийлеринге болгаш курорттарынга эмненип турда, чоок кижилеринге үдедир арганы берген.
Оон аңгыда, ТШО киржикчилериниң ажы-төлүнге деткимчениң бөлүк хемчеглери, ооң иштинде школага чемнениринге болгаш хөй-ниити транспорт өртээге компенсацияны бээри. ТШО киржикчилериниң ада-иелери ажы-төлүнүң садик барып турары дээш дадывыр төлевиринден хосталган.
Оон аңгыда чыылганнар республиканың чогуур күрүне программаларының: «Тыва Республиканың хамаатыларынга социал деткимче», «Чедингир хүрээлел», «Чурттакчы чонну ажылга хаара тударынга деткимче», «Даштыкы чурттардан чаңгыс чер чурттугларның эки тура-биле көжүп кээрин деткиири» деп программалар күүселдезин сайгарган.
«Өг-бүле» национал төлевилелдиң хемчеглерин боттандырары-биле «Тыва Республикада хамаатыларга социал деткимче» программа езугаар Дерзиг-Аксы суурда 180 оруннуг хоочуннар болгаш инвалидтер бажың-интернадын тудуп турар. Владислав Ховалыг эрткен неделяда тудугнуң хыналдазының түңнелин Магомед Абдулхалимовка дыңнаткан.
Бажың-интернатта эмчи болгаш амыдырал-хандырылга ачы-дузазының өрээлдерин чада аайы-биле тудуп турар. «Бастион» тускай тудуг организациязы» КХН тудуг-монтаж ажылдарын кылып турар. Керээ езугаар бүгү-ле ажылдар кылдынар: оран-савазын тудары, иштики болгаш даштыкы инженер четкилерин эптеп тургузары, девискээрин чаагайжыдары. Бажың-интернат техниктиг аргалар болгаш дериг-херекселдер-биле дериттинер.
Тудуг чери бо чылдың төнчүзүнге чедир бүгү ажылдарны керээ езугаар кылып доозар хүлээлгелиг. Ынчалза-даа хыналда үезинде тудуг графиктен озалдап турары демдеглеттинген. Владислав Ховалыг ажылдың темпизин улгаттырып, ажылдың графигин болгаш шынарын шыңгыы хайгааралга алырын чогуур ведомстводан негээн.
Владислав Ховалыг объектини шынарлыг тудуп доозуп, ооң чурттакчыларынга амгы үениң шупту негелделеринге дүгжүп турар таарымчалыг байдалдарны тургузары регионга чугула дээрзин демдеглээн.