Кадыг коммунал бок болбаазырадыр регионалдыг оператор «ТСП» КУБ-биле кады хереглекчилер-биле дүрген харылзажыр дээш MAX мессенджерде чат-ботту ажылдаткан. Сервис ажыглакчыларга кадыг коммуналдыг бокту үндүр сөөртүрүнге хамаарышкан айтырыгларга харыыларны бээр. Чат-ботту ажыглап эгелээр дизе, max.ru/gup_tsp_bot деп айтыгже кирер.
Регионалдыг оператор чат-бот таварыштыр кадыг коммуналдыг бокту үндүр сөөртүрүнге болгаш регионалдыг операторнуң ажылының дугайында эң хөй айтырыгларга тайылбырларны ап болурун дыңнаткан.
Чат-бот дузазы-биле мындыг айтырыгларга харыыларны ап болур:
- кадыг коммунал бок деп чүл?
- «ТСП» КУБ-туң кадык коммунал бокту үндүр сөөрткени дээш, чүге мен төлээр ужурлуг мен?
- контейнер чаны хирлиг. Чүнү канчаарыл?
- бодунуң өрезин канчаар билип алырыл?
- кадыг коммуналдыг бок дээш канчаар төлээрил?
- эрги эт-септи кайнаар октаарыл?
Оон аңгыда чат-бот таварыштыр хереглекчиниң амгы тарифтерин болгаш санаашкыннарны тодарадып, эде санаашкынны кылып бээрин дилеп база квитанцияда частырыг дугайында дыңнадып болур.
«ТСП» КУБ бот чамдык айтырыгларга хамаарыштыр хууда байдалын шын тодарадып, чогуур медээлерни бээр дээш, немелде аргаларны сүмелеп болурун тайылбырлаан.
Регионалдыг оператор ооң-биле чергелештир, клиентилер-биле харылзажырының эрги каналдары ажылдап турарын сагындырган. Оон аңгыда хереглекчилер 5-39-10 (нем. 204) дугаарлыг бухгалтерияже долгааш, санаанын база төлээниниң аргаларын хынадып болур. Бок үндүр сөөртүр керээни чарар азы бар керээзин чаартыр дизе, Кызылдың Кочетов кудумчузунуң 30 дугаар бажыңында, 15 дугаар өрээлде, керээ килдизинче долгаар. Харылзажыр дугаары 89133501174.