Тываның Спорт яамызы спортчу белеткел дээш төлээн үндүрүг төлевиринден каш түңнү эгиттирип ап болурун регионнуң чурттакчыларынга сагындырган. Ындыг арга хамаатыларның спортка сонуургалын оттуруп, күш-культура-кадыкшылга ачы-дузазының шынарын бедидер ужурлуг.
Амгы үеде регионда күш-культура болгаш спорт адырында 59 күш-культура болгаш спорт организациялары база 27 хуу сайгарлыкчылар ажылдап турар. Оларны Россияның Спорт яамызының даңзызынче киирерин сүмелеп турар, ооң соонда олар спорт дээш социал үндүрүг чиигелдезин ап болур.
Республиканың Баштыңы Владислав Ховалыг спорттуң чедингирин бедидеринге хуу спортчу субъектилерниң ролюн демдеглээн: «Тывага спортту чедингир болдурар дээш доктаамал ажылдап турар бис. Республика чурттакчыларының көвей кезии тренировкалап, кадык амыдыралды норма кылдыр хүлээп алыры – бистиң сорулгавыс. Аңаа хуу фитнес-клубтар, спортчу секциялар база хууда тренерлер улуг рольду ойнаар.
Үндүрүг чиигелдези кижилерге дыка эки деткимче апаар: РФ-тиң Спорт яамызының албан езузунуң реестринче кирген организация азы хуу сайгарлыкчы спортчу кичээлдериниң өртээнден 13 хууну күрүнеден эгиттирип алыр аргалыг» - деп, Тываның Баштыңы бодунуң блогунда бижээн.
Республика Баштыңы бо чылын реестрде бүрүткеткен «ALMAS» уругларның дайынчы уран чүүл школазының чедиишкиннерин демдеглээн. Кунг-фуга Россияның, Европаның, Кыдаттың чемпиону Айыжы Иргит – школаның үндезилекчизи. Школа тургустунганындан бээр 300 ажыг кижизидикчилериниң арга-шинээн ажыдарынга дузалаан. Спортчу клубтуң сургуулдары регионалдыг болгаш регионнар аразының маргылдааларынга тиилеп, шаңналдыг черлерни ээлеп турарлар.
Бо чылын школа уругнуң спортчу кичээли дээш үндүрүг чиигелдезин алган Тывада бирги хуу спортчу клуб болган. Владислав Ховалыгның демдеглээни-биле алырга, ол үндүрүг ада-иелерге бюджедин шын камнаарынга идигни берип, а спортчу объектиге бүзүрелдиң болгаш чижилгениң бедээниниң демдээ болган.
Спортчу субъектилер даңзызынче кирер дизе, Кызыл хоорайның Калинин кудумчузунуң 11 дугаар бажыңында, Тываның Спорт яамызынче азы tuvasport@mail.ru электроннуг почтаже билдириишкинни болгаш документилерни октябрь 1-ге чедир дужаар ужурлуг. Кордакчылар мындыг негелделерге дүгжүп турар ужурлуг:
— организацияның азы хуу сайгарлыкчының кол угланыышкыны – күш-культура болгаш спорт ажыл-чорудулгалыг болур;
— штатка тускай эртем-билиглиг специалистер ажылдаар;
— организация ол үеде үндүрүглер болгаш чыылдаларда өрези чок, ол ышкаш хагдынар азы дүжер деп турбас ужурлуг.
Спорт яамызының Спорт болгаш күш-культура хөгжүдер килдизиниң бо телефонундан реестрже киирериниң дугайында арга-сүмени билип ап болур: 8 (39422) 5-09-22.