Тыва Республиканың Баштыңы Владислав Ховалыг Москвага ажылчын сургакчылаашкын үезинде, Федералдыг агаар транспорт агентилелиниң (Росавиация) начальниги Дмитрий Ядров-биле ужурашкан. Ийи тала Кызылдың аэропортунуң хөгжүлдези база регионнуң транспорт чедингирин хандырарының дугайында темага чугааны чоруткан.
Дмитрий Ядров Тываның найысылалы-биле авиааргыжылгага хереглел доктаамал өзүп турарын демдеглээн: 2022 чылдан бээр республикаже пассажирлер сөөртүлгези 60 ажыг хуу өскен, а 2025 чылдың төнчүзүнде 148 муң кижи чеде берген. Бо угланыышкын Тывага турисчи сонуургалдың өскенин база чурттакчыларының талазындан агаар-биле ужарының нептерээнин көргүзүп турар. Инфраструктура чаартылгалары чокта аргыжылганы моон соңгаар өстүрери болдунмас дээрзин өөренип көргеш, республиканың агаар оруктарын чаартырынга белеткел ажылдарын эгелээрин удуртукчулар дугурушкан.
«Ужудуушкуннар таарымчалыг болгаш айыыл чок болурун хандырар дээш, инфраструктураны чаартыры негеттинип турар. Модернизацияга белеткелди ам-на эгелээрин дугуруштувус. Агаар транспортунуң инфраструктуразын хөгжүдер тускай федералдыг фондудан акшаландырыышкынның бирги чадазын тускайлаар» - деп, Владислав Ховалыг MAX-та бодунуң блогунга демдеглээн.
Республиканың авиабүдүрүлгезиниң чиигелделиг болгаш социал ужур-уткалыг ужудуушкуннарны доктаамал ужударынга эргежок чугула федералдыг деткимчениң айтырыын база аңгы сайгарып чугаалашкан. Ооң ажылында эки шимчээшкин барын 2026 чылдың статистиказы бадыткаан. 2026 чылдың баштайгы сес айларында «Кызыл» аэропортунуң ачы-дузазын 101596 пассажир ажыглаан, эрткен чылдың ол-ла үезиниң көргүзүүн ажа берген. Шупту угланыышкыннарже өзүлде демдеглеттинген: регионнар аразының маршруттарынга 97935 (+2,4 хуу), чурттар аразының шугумнарынга 1148, иштики авиашугумнарга 1357 пассажирлер ушкан, эрткен чылдың көргүзүүнден 16,7 хуу хөй.
Июнь айдан эгелеп «S7 Airlines» авиакомпания-биле Москваже дорт аргыжылга неделяда үш катап көвүдээн, IV делегей чергелиг буддийжи форум үезинде Москва, Новосибирск, Улан-Баторже немелде рейстерни организастаан. Вокзал чоогунуң девискээринде улуг чаагайжыдылга ажылдары доозулган, ооң иштинде автомашиналар тургузар черни, светодиодтуг информация экранын, дыштаныр зонаны кылган. Объект 90 хуу белен, автомашиналар тургузар төлевирлиг зонага шлагбаумнуг комплексти тургузарын манап турар.
Региондан пассажирлерге чиик өртектиг ужудуушкуннарның үндезини субсидиялыг билеттер бооп артпышаан. Красноярск - Кызыл, Улан-Удэ - Кызыл, Новосибирск - Кызыл угланыышкыннарында маршруттарже федералдыг акшаландырыышкынны хаара туткан, ол маршруттарның чамдыызын республика кады акшаландырып турар. Маршрут четкизин калбартыр дээш, S7 компания-биле Новосибирск таварты транзит маршруттуг Кызыл-Томск рейсти хүннүң-не ужудуп эгелээр дугайында дугуржулга чедип алдынган.
Владислав Ховалыг ужуражылганың төнчүзүнде, Росавиацияның удуртулгазынга республиканың хереглелдеринче кичээнгейни салып, хамаатыларның амыдырал-чуртталгазының шынарын экижидер дээш кады демниг ажылдаанынга өөрүп четтиргенин илереткен.