«Победа» спорт-культура төвү 2025 чылдың декабрьда ажыттынганындан бээр 36 муң ажыг кижи культурлуг болгаш спортчу хемчеглерже киришкен. «Россияда спорт» күрүне программазы-биле туттунган хөй талалыг ажыл-чорудулгалыг спортчу-культура төвү регионга хөй санныг киржикчилерлиг болгаш көрүкчүлерлиг делегей чергелиг культура хемчеглерин эрттирер арганы берген. Республиканың Баштыңы Владислав Ховалыгның даалгазы-биле ол төп кандыг-даа назылыг болгаш сонуургалдыг кижилерге спортчу болгаш культурлуг-дыштанылга каттыжыышкыннарын ажылдадыр шөл кылдыр база ажылдап турар.
Спортчу-культура төвүн ажыткан соонда, Тыва Республиканың чыынды командаларының спортчу белеткел төвүнүң удуртулгазынга шилчиткен. Төптүң удуртулгазы СКТ-ге профессионал спортчу белеткелди, делегей чергелиг концерт шөлүн, уруглар болгаш аныяктарның сайзыралынга шөлдү каттыштырган.
Төптүң дыңнатканы-биле алырга, 2025 чылдың декабрьдан 2026 чылдың сентябрьга чедир «Победа» спортчу-культура төвүнге 10700 ажыг кижи киришкен 39 спортчу-маасалыг хемчеглер, ол ышкаш 10 культура-массалыг хемчеглерни 25500 көрүкчү көрген.
Бо чайын спортчу-культура төвү бүгү чурттан 300 хире спортчулар киришкен Fonbet Россияның Кубогу дээш эр болгаш херээжен улус аразынга дзюдо маргылдаазы бүгү-россия деңнелдиг улуг спортчу хемчеглерниң бирээзи болган. Маргылдааның организаторлары, киржикчилери болгаш көрүкчүлер объектиниң спортчу шөлүнүң инфраструктуразын бедии-биле үнелээн.
«Победа» төп спорттуң аңгы-аңгы хевирлеринге республика маргылдаалары эрттирер шөл апарган. Майда төпке тускай шериг операциязының хоочуннарынга «Ада-чурт камгалакчыларының кубогу» дээш шилилде маргылдаалар бүгү Тывадан киржикчилерни хаара туткан. Бо дыштаныр хүннерде Тываның Баштыңының Кубогунга оолдар болгаш уруглар аразынга волейбол маргылдаалары болуп эрткен.
Спортчу-культура төвү улуг концерт шөлү болуп, российжи болгаш делегей чергелиг күүседикчилерни республикаже чалап алыр арганы берген. GAZAN, Эллаи дээн ышкаш артистер концерттерин көргүскен.
Амгы үеде спортчу-культура төвүнде бичии уруглар болгаш аныяктарга үш культура-дыштанылга бөлүктери: кыс уругларга «Сыын-Сайыр» мода болгаш костюмнар театры, оолдар болгаш элээдилерге «Эзир» национал танцы школазы ажылдап турар. Оон аңгыда, чаа өөредилге чылында чаа танцы хевирин өөредир «Чирспорт» деп студия ажыттынган. Төптиң баазазында уругларга волейбол бөлгүмү база ажылдап турар. Ол ышкаш хөй талалыг ажыглалдыг зал, улуг-биче тренажер залдары база теннис залы база бар.
Төп культура-массалыг хемчеглерже чиигелделерни берип турар. Эвээш орулгалыг өг-бүлелерниң ажы-төлү, үш азы оон хөй ажы-төлдүг өг-бүлелерниң 18 харга чедир уруг-дарыы, өскүс болгаш ада-иезиниң хайгааралы чок арткан уруглар, назы четпээннер учедунда болгаш корум-чуруму багай уруглар, инвалидтер (I, II, III бөлүктер), пенсионерлер чиигелделиг өртектер-биле төпке барып болур эргелиг. Тускай шериг операциязының киржикчилери болгаш оларның өг-бүле кежигүннери, ол ышкаш дайынчы хөделиишкиннер хоочуннары хемчеглерни чартык өртээ-биле көрүп болур.
2013 чылда тудуп эгелээн бо объектини Россияның Президентизи Владимир Путинниң, Россияның Чазааның деткимчези база федералдыг Спорт болгаш Тудуг яамыларының киржилгези-биле доосканын демдеглээри чугула. "Эльбрусметалл" компаниязы, Ажаалга банкызы база Россияның улуг спортчу федерациялары кадыкшылы кызыгаарлыг кижилерге тренажер залдарының бирээзин дериг-херексел-биле хандырарынга үлүг-хуузун киирген.
Владислав Ховалыг спортчу-культура төвү чонга бараан болур ужурлуг деп, чаңгыс эвес катап демдеглээн. Ооң даалгазы-биле, албан чериниң удуртулгазы хөй кижилерге ажыктыг болур кылдыр, ачы-дузалар даңзызын калбартыр хемчеглерни ап турар.