«Ада-чурт камгалакчылары» фондунуң филиалы дайынчы хөделиишкиннер үезинде кемдээшкининден хол-буттарының болгаш өске-даа кезектериниң шимчээшкинин чидирген инвалидтерниң хууда хереглелин көрүп, чурттаар оран-саваларын эде чаартып турар. Ук хемчегни боттандырып эгелээнден бээр Кызылдан болгаш Тываның аңгы-аңгы кожууннарындан 52 камгалакчы ол деткимчени алган.
Тускай шериг операциязының инвалид хоочунунуң хүн бүрүде амыдыралын элээн чиигедир дериг-херекселдер болгаш эт-сеп комплектизин берип турар. Бажыңын эде дерээн ачы-дузаның ачызында, ТШО хоочуннары бажыңындан ажылдап, хүн бүрүнүң айтырыгларын хостуг шиитпирлеп болур. Программага киржир дизе, чүгле социал координатору азы «Ада-чурт камгалакчылары» фондунуң филиалы-биле харылзажыр.
Бо хүнге чедир Кызыл, Туран, Шагаан-Арыг, Чадаана, Самагалтай, Чаа-Хөл, Шекпээр болгаш өске-даа чурттакчылыг черлерде ТШО хоочуннарынга таарымчалыг байдалдарны хандырган.
Комиссия республиканың аңгы-аңгы булуңнарын кезип, эде дериир 100 ажыг чуртталга бажыңнарынга чедип, хынаан. Балыгланган соонда, эң ыраккы Өвүр кожууннуң шериг комиссариадында шериг албанын ам-даа уламчылап чоруур шериг албанныг кижиниң чурттаар черинге хамаарыштыр чагыгны комиссия кежигүннери бижээш киирген.
Таңды кожууннуң Дүрген суурдан ТШО хоочуну Вячеслав Оюн бажыңын эде дерип бээрин дилээн баштайгыларның бирээзи. Ол балыглангаш, холун чидирген. Ындыг болзажок, хоочун боду улуг бажыңны тудуп алган. Фонд Вячеславтың хереглелинге таарыштыр бажыңның иштики дериин чаартырынга дузалаан. Чем кылыр бүрүн өрээлди болгаш «угаанныг бажың» системаны салып берген. Хоочуннуң үн командазы-биле бажыңда ажылдар кылдынып турар: пылесостаптар, көжегелерни ажыдып-хааптар, чырыкты болгаш телевизорну өжүрүп-кыпсыптар. Ол ышкаш бажыңда компьютерлиг ажылдаар олутту тускайлаан, ынчангаш хоочун бажыңындан үнмейн ажылдап, өөренип болур апарган.
Кызылдан ТШО хоочуну Вадим Кара-оолдуң бажыңын чоокта чаа кылган. Херектиг эт-сеп болгаш дериг-херекселдерден аңгыда, эжиктерин алгыдыр кылып берген. Ол бедиин өйлеп-таарыштырап ап турар стол, сандайлыг компьютеринге дыка өөрээн. Ада-чурт камгалакчызы ырактан магистратура программазынга өөренир планныг.