Тываның Чазааның ээлчеглиг хуралында «2025-2030 чылдарда Тыва Республикада кадыкшылды катап тургузарының чогумчалыг эмчи реабилитациязы» республика программазын бадылаан. Программа «Узун болгаш идепкейлиг назын» деп национал төлевилелдиң «Кадыкшылды катап тургузарынга таарымчалыг эмчи реабилитациязы» федералдыг төлевилел күүселдези-биле эмчи реабилитацияның экижиткен системазын тургузар деп көрген. Республиканың Баштыңы Владислав Ховалыг программаның кол сорулгазы – аараан соонда чурттакчыларның анаа амыдыралынче дүрген болгаш чедимчелиг эглип кээринге дузалажыры деп демдеглээн.
Программа боттандырылгазы-биле эмчи дузазының шупту чадаларында, стационардан эгелээш, чурттап турар чериниң поликлиникаларынга эмнедиринге чедир, аарыг кижилерге эмчи дузузының болгаш реабилитациязының чедингирин база шынарын хандырар. Оон аңгыда, реабилитация албанының иштинде килдистерни кадрлар-биле четчелээшкинин экижидип, эмчи реабилитацияның дузазын көргүзүп турар эмнелге организацияларынга технологтуг хандырылганы сайзыраңгайжыдып дээш, өске-даа элээн каш хемчеглерни көрген.
Ол ышкаш программа дээди звено удуртукчуларының, ооң иштинде Тыва Республиканың Чазааның Даргазының кадык камгалал болгаш социал айтырыглар харыылап турар оралакчызы, сонуургалдыг яамылар болгаш ведомстволар удуртукчулары болгаш төлээлери база хөй-ниити болгаш пациент организацияларның төлээлерин киириштирип, эмчи реабилитациязының айтырыглары-биле ведомстволар аразынга сырый кады ажылдажылганы организастаар хемчеглерлиг.
Эмчи реабилитациязының хемчеглери-биле чурттакчы чоннуң аарыг-аржыктан болгаш кемдээшкиннерден катап тургустунарының аргазы 26,5 хуу көвүдээри – программаны боттандырганының төнчү түңнели.
Бо хүнде республикада улуг улуска эмчи реабилитациязының үш чадалыг системазы ажылдап турар. Республиканың 1 дугаар эмнелгезиниң баазазында эгеки эмчи реабилитациязының салбыры бирги чадазында ажылдаар. Республиканың 1 дугаар эмнелгезинде төп нерви системазының талазы-биле аарыг кижилерге эмчи реабилитациязының салбырынга, ол ышкаш «Серебрянка» санаторий-профилакторийниң төп нерв системазы аарыг кижилерге эмчи реабилитациязының салбырынга ийиги чадазын чорудар. Республиканың консультативтиг-диагностика төвүнүң эмчи реабилитациязының амбулаторлуг салбырында, Улуг-Хемниң, Чөөн-Хемчиктиң болгаш Барыын-Хемчиктиң муниципалдар аразының эмнелге төптеринге, ол ышкаш «Серебрянка» санаторий-профилакторийниң хүндүскү салбырынга эмнедири – үшкү чада.
Уругларның эмчи реабилитациязын ийи эмнелге организациялары – республиканың уруглар эмнелгези база Тыва Республиканың Перинаталдыг төвүнге үш чадага эрттирер.
Тываның Кадык камгалал яамызының медээзинден алырга, эрткен чылын ыяап эмчи камгаладылгазы-биле чыдып эмнээр негелде-биле 1156 улуг кижи эмчи реабилитациязын алган. Оларның 51,4 хуузу төп нерви системазының, а 24,3 хуузу сөөк-даяк база нерв аппарадының, 13,4 хуузу чүректиң аарыгларындан реабилитацияларны эрткен.