«Россияның спорту» күрүне программазынче кирип турар «Күш-культура болгаш спортту хөгжүдер» республиканың күрүне программазы-биле бо чылын Тывада беш ангар хевирлиг спорт залдары туттунуп турар. Спортчу объектилерниң бирээзи – Барыын-Хемчик кожууннуң Дөң-Терезин суурда залды сентябрь эгезинде ажыглалче киирген, а артканнарының тудуу доозулгалак. Бо дүрген тудар болгаш хөй чарыгдал негеттинмес спортзалдар командалыг спортчу оюннар база маргылдаалар эрттиреринге эптиг.
Республиканың Спорт яамызы тудугну организастап турар. Суурларга мындыг хемчээлдиг спортчу объектилер көдээ чурттакчыларга, бирги ээлчегде – уруглар болгаш аныяк-өскенниң күш-культура болгаш спорт-биле доктаамал белеткенир аргаларын калбартыр деп, яамы санап турар.
Спорт сайыды Владимир Тулуш Дөң-Терезин суурда спорт залының ажыдыышкынының үезинде, чаа зал суурнуң чурттакчыларынга спорт-биле өңнүктежип, маргылдааларны эрттирип, аныяк спортчуларның арга-шинээн улам ажыдар деп демдеглээн.
Бо чылын Чеди-Хөл кожууннуң Сайлыг болгаш Чөөн-Хемчик кожууннуң Теве-Хая суурларында ангар хевирлиг спорт залдарын тудуп эгелээн. Бии-Хем кожууннуң Өөк, Каа-Хем кожууннуң Кундустуг, Чөөн-Хемчик кожууннуң Шеми, Бай-Тайга кожууннуң Хемчик суурларында спортчу залдарны тудуп дооскан.
Чурттакчыларның чагыгларынга даянгаш, каяа, чеже ангар хевирлиг спорт залдарын тудары база суурда спортчу инфраструктураның барындан тодараттынар дээрзин демдеглезе чогуур. Тускай комиссия чурттакчыларның дилеглерин өөренип көргаш, республика Баштыңы Владислав Ховалыг-биле сүмелешкеш, шиитпирни хүлээп алыр.
Чижээ, Улуг-Хем кожууннуң Арыг-Бажы суурнуң чурттакчылары ындыг объектини тудуп бээр дугайында база бир дилегни киирген. Суурда «Эзирлер уязы» губернатор төлевилели ышкаш кылдынган бичежек спортзалы ажылдап турар, ынчалза-даа ында колдуунда хүреш чоруп турар. Республика Баштыңы Арыг-Бажынга чорда, суурнуң чурттакчылары массалыг спортка тааржыр делгем оран-саваны тудуп бээрин дилээн.
Регионалдыг эрге-чагыргалар губернатор эгелээшкиннерин болгаш федералдыг деңнелдиң программа аргаларын ажыглап, көдээ суурларны спортчу объектилер-биле хандырар айтырыгны доктаамал шиитпирлеп турар. Сөөлгү алды чылда көдээ суурларда ангар хевирлиг чеди спортзал туттунган.